Аргентина банкротира – вторпат за 13 години!

Добивај вести на Viber

Аргентинските власти не успеаја да се договорат со американските фондови за преструктурирање на долгот, што фактички значи банкрот на оваа земја. По средбата, министерот за економија на Аргентина Аксел Кисилоф рекол дека властите нема со„фондови-мршојадци“ да потпишуваат спогодби кои можат да ја загрозат иднината на Аргентинците. „Граѓаните можат да бидат мирни, бидејќи утре ќе биде обичен ден“, рече тој. Сепак, рејтинг агенцијата Стандард енд Пурс на аргентинските обврзници им додели рејтинг „селективен банкрот“. Фондовите Елиот кепитал менаџмент и Аурелиус кепитал менаџмент, кои побаруваат исплата на долговите, уште не го коментирале исходот од преговорите. Во 2001 година Аргентина веќе преживеа банкрот. Тогаш властите во земјата не беа во можност да отплатат долг од 95 милијарди долари. Буено Аирес договори преструктурирање, а според спогодбата кредиторите ги заменија старите обврзници со нови за 75-79 проценти од нивната вредност. Група инвеститори, меѓу кои и овие два фонда, не се согласија на таквите услови и поднесоа тужба. Во јули 2012 судот во САД пресуди дека Аргентина мора да плати 1,3 милијарди долари, колку што побаруваа фондовите кои не се согласија со реструктурирање. Но, аргентинските власти не сакаат да платат бидејќи стравуваат дека тоа ќе покрене лавина слични побарувања и од другите доверители, кои исто така не прифатија преструтурирање на долгот пред 10 години. Аргентинската економија, која се наоѓа во рецесија, страда од нестабилност на домашната валута и од екстремно висока инфлација, која по некои проценки достигнува 40%. Според експертите, банкротот ќе ја разниша довербата во економијата, што ќе доведе до уште поголем притисок врз националната валута и ќе предизвика дополнителна забрзана инфлација, ќе влијае на поскапување на увезената стока и ќе ја влоши ситуацијата со невработеноста. Освен, тоа, банкротот се очекува значително да ги намали девизните резефви на Аргентина, кои сега изнесуваат 29,7 милијарди долари и се меѓу најниските во регионот.