Атанасоски: Имаше обид за лична дискредитација на луѓето коишто настапија со барање за реформи во ВМРО-ДПМНЕ
Објавено во: Македонија 25 Јуни, 2017
Сиве овие години навистина беше тешко низ органите на партијата да се протурка различна идеја од таа на актуелното раководство, а да не биде сфатена како предавство или фракционизам во партијата, изјави Влатко Атанасоски од иницијативата за реформи во ВМРО-ДПМНЕ, во неделното интервју на Радио Слободна Европа.
Генерално, од тоа што јас успеав да го видам, беше обид за лична дискредитација на луѓето коишто настапија со барање за реформи во ВМРО-ДПМНЕ, вели тој.
„Членството реагира нормално, во најголем дел добивам повици за поддршка, меѓутоа од страна на актуелното раководство ние сме целосно изолирани, таа е политиката на игнорирање со тоа што се сака да се прикаже дека ние демек не сме широка групација, сме малку луѓе, коишто, според нивното толкување, од различни причини сме побарале нешто што беше доживеано и беше тенденциозно насочувано да биде доживеано како предавство,“ - вели Атанасоски.
Идејата којашто му е многу важно да допре до јавноста е да се тргне стигмата од ВМРО-ДПМНЕ дека за грешките коишто се случуваа во институции раководени од страна на кадри од ВМРО-ДПМНЕ или за создавањето на политичката криза, секој член на ВМРО-ДПМНЕ е подеднакво одговорен.