Бањата Стрновац очекува над 10.000 посетители

Добивај вести на Viber

Бањата Стрновац во општина Старо Нагоричане лани имаше 8.000 посетители, а оваа сезона се  очекува бројот на гости да надмине 10.000.

Официјално од 1 јуни бањата е отворена за капачите, а просторот е среден, малиот базен е покриен со мрежа, и има видео надзор.

„Бањата Стрновац има нов изглед. Се одржува 24 часа, имавме некои градежни зафати и од 1 јуни таа работи. Температурата на водата е 39.5 степени, а планираме и да засадиме цвеќе околу бањата. Имаме проток на вода 12 литри во секунда. Гости покрај од Куманово и соседните градови како Свети Николе, Крива Паланка, Кратово, Штип, ни доаѓаат и од соседна Србија од Прешево, Бујановац и Врање“- вели Борко Соколовиќ, директор на јавното комунално претпријатије „Козјак“ од општина Старо Нагоричане кое стопанисува со бањата.

Бањата е оддалечена 2 километри од излезот на селото Старо Нагоричане, или 17 километри од Куманово. Таа е лоцирана на десниот брег на реката Пчиња. Тука луѓето доаѓаат поради благотворното дејство на водата, но и рекреативно само поради капење.

За да бањата биде подостапна за посетителите, во текот на летото дел од локалните превозници организираат и превоз до Стрновац.

С.А.