Банкарите и гувернерката на средба: Нема исплата на дивиденди

Добивај вести на Viber

Банкарите на средба со гувернерката Анита Ангеловска Бежоска - тема на разговорите денеска е Одлуката на Советот на Народната банка за привремено ограничување на распределбата и исплатата на дивиденда на акционерите на банките и штедилниците. Присуствувале претствниците на сите банки членки на Македонската банкарска асоцицијација МБА. Иако не е конкретно наведено, банкарите ќе ја испочитуваат одлуката и нема да поделат дивиденда. Заклучено било во иднина да имаат навремена соработка за евентуално да се види дали има можност за предвремено укинување на времената забрана.

„Договорено е во наредниот период дополнително да  се интензивира споделувањето податоци и информации од банките и штедилниците со Народната банка.  Со тоа ќе се олесни навременото оценување на потенцијалните ефекти од КОВИД кризата што ќе овозможи и оцена дали има можност за предвремено укинување на временото ограничување за распределбата и исплатата на дивиденда на акционерите на банките и штедилниците, притоа водејќи се од целта за постојано одржување на финансиската стабилност, што е во интерес на сите субјекти во економијата, вклучително и акционерите во банките и штедилниците, стои во соопштението.

На средбата имало дискусија, а гувернерката Бежоска ги презентирала согледувањата и причините за носење на споменатата Одлука од страна на Советот на Народната банка.

„Мерката на  Народната банка беше оценета како превентивна, во функција на натамошно јакнење на потенцијалот на банките и штедилниците за  справување со последиците од Ковид кризата, во услови на сеуште изразена неизвесност и потенцијални ризици. Едногласно беше констатирано дека како резултат на здравите фундаменти на банкарскиот систем, политиките и мерките преземени од страна на Народната банка, како и прудентното управување и работење од страна на банките и штедилниците, банкарскиот сектор во досегашниот период успешно одговори на сите предизвици од КОВИД кризата и обезбеди континуитет на сигурно и стабилно работење, како и испорака на  значајна кредитна поддршка спрема реалниот сектор и населението. Довербата на граѓаните и компаниите во банките и штедилниците останува на високо ниво, што се гледа и од растот на вкупните депозити, кои во јануари 2021, споредено со истиот месец минатата година, се зголемени за 6,3 проценти, велат од МБА. 

Истовремено, Македонската банкарска асоцијација апелира до политичките структури и сите други субјекти во земјава да се воздржат од какви било неиздржани и непроверени коментари, оценки и квалификации за состојбите во банкарскиот сектор, а особено да избегнуваат политички маркетинг на сметка на банките и штедилниците и интересите на сите нивни клиенти – граѓани и компании, како и на нивните акционери.