„Бауер“ за 8 милиони евра ќе гради нова зграда за Агенцијата за храна и ветеринарство

Добивај вести на Viber

Агенцијата за храна и ветеринарство во системот за јавни набавки објави дека е склучен договор за 8 милиони евра со „Бауер“ за изградба на нова административна зграда со лабораториски простории.

Зградата ќе се гради во Општина Аеродром а проектант е „Прима Инжемеринг“. Цената на договорот е 515.202.937 денари.

Изградбата треба да биде завршена за две години. Исплатата ќе се врши месечно според сработеното, без авансно плаќање. Понудата била доставена до АХВ пред шест месеци од „Бауер“. Станува збор за работа на површина од 2.655 метри квадратни.

Покрај „Бауер“, имало уште седум понудувачи меѓу кои уште Вардарградба, Страбаг, Бетон, АК-Инвест, Гранит, Стентон Градба и Фабрика Карпош. Највисоката понудена цена без ДДВ била 652,7 милиони денари.

Агенцијата за храна и ветеринарство и Агенцијата за финансиска поддршка на земјоделството се наоѓаат во комплексот на поранешен „Македонија Табак“ помеѓу Аеродром и Кисела Вода во Скопје, имот кој сега е во сопственост на една од деловните банки како поранешна хипотека.

Двете институции наскоро треба да се отселат затоа што просторот е сензитивен поради тамошната преселба на Агенцијата за национална безбедност.  Според огласот што беше објавен изминатата есен, АНБ таму треба да купи имот до 2.100 метри квадратни, а цената да не биде поголема од 90.000 денари по квадрат.

Компанијата Бауер БГ во периодот од 2011 година до првата половина на 2014 година градеше најинтензивно преку јавните набавки, а од сите државни институции и општини со кои работела инкасирала договори вредни 30,8 милиони евра. 

Како што е познато, „Бауер БГ“ доби многу големи тендери за време на владеењето на ВМРО-ДПМНЕ, пред се од Град Скопје додека градоначалник беше Коце Трајановски, а воедно компанијата учествуваше во изградбата на објекти од проектот „Скопје 2014“. 

А.К.