Бебе од 3 месеци сослушано заради тероризам
Објавено во: Свет 18 Април, 2017
Американската Амбасада во Лондон повика тримесечно бебе на сослушување за тероризам.
Ова се случи откако неговиот дедо направил грешка при пополнувањето на образецот за виза во Електронскиот систем за одобрување на патувањата (ЕСТА).
„Гардијан“ објави дека семејството на бебето Харви Кенион Кернс планирало да отпатува од Велика Британија во градот Орландо, во американската соузна држава Флорида.
Дедото на Харви, Пол Кенион на прашањето „Дали планирате или сте учестувале во терористички активности, шпионажа, саботажа или геноцид?“ кликнал на опцијата „да“, поради што момчето, кое живее во градот Пјонтон е повикано на разговор во Амбасадата во Лондон.
„Не можев да верувам дека не сфатиле дека станува збор за грешка и оти бебе од три месеци не може никому да наштети“ - изјави 62-годишниот Кенион.
Тој подоцна сфатил што направил. Вели дека патувањето до Лондон траело речиси десет часа, што е повеќе од летот од Манчестер до Орландо, а грешката ги чинела и три илјади фунти (околу 3.537 евра).
„Тоа навистина беше скапа грешка, но се надевав дека американската Амбасада ќе го забалежи тоа. Се сомневам дека терористите при пополнувањето на образецот ќе ја изберат опцијата „да“- рече Кенион.
Тој додаде дека бебето при сослушувањето било мошне трпеливо и не плачело.