Бектеши бара средба со ССМ, тврди дека има грешка при пресметка на минималната кошничка
Објавено во: Економија 16 Март, 2023
Четиричлено семејство може да преживее со 43.000 денари, не му требаат 50.000 денари, вели министерот за економија, Крешник Бектеши.
Тој бара состанок со Сојузот на синдикати на Македонија затоа што смета дека е направена грешка во пресметката на минималната синдикална кошница која ССМ ја објавува секој месец.
„Утврдено е од нашите соработници и моите советници дека има грешка во утврдувањето на минималната синдикална кошница. Што значи грешка? Можеби е ненамерна, можеби е и техничка грешка. Минималната синдикална кошница во нашата држава не е 50.000 денари, но не надминува 43.000 денари согласно методологијата којашто била претходно. Значи, двапати се вкалкулира инфлацијата од август, па наваму во методологијата и сите елементи од претходната методологија“, рече Бектеши.
Минималната синдикална кошница за едно четири члено семејство за месец февруари изнесува 50.909 денари. Најголем дел од овие трошоци одат за храната и пијалоците со дури 44,42 отсто или 19.379 денари. Потоа, влегува домувањето кое учествува со 30,5 отсто или 13.306 денари. Помалку се троши на обувки, облека, превоз, култура, за здравјето. Со два минималци не може да се покрие минималната кошничка.