БЕЗБЕДНОСТ НА ХРАНА: Има ли пластика во чоколадите „МАРС“ во Македонија?

Добивај вести на Viber

Во повлекувањето на чоколадитe марс, сникерс, милки веј и минијатурис, се вклучени само оние чоколади што се произведени во фабриката „Марс” во градот Вегел во Холандија. Тие се и главните снабдувачи со овие чоколади за земјите од Европа и во дел од азиските земји. Во повлекувањето не се опфатени производите што произведуваат во централата „Марс“ во Америка, пренесуваат странските медиуми. Засега е издадена наредба од компанијата за повлекување на чоколадитe сникерс, марс, милки веј и минијатурис во 55 земји во Европа. Во Велика Британија, Холандија, Шпанија, Италија, Белгија и Франција, Агенциите за храна веќе ги повлекле чоколадните барови сникерс, марс и милки веј. Агенцијата за храна во Велика Британија стандарди на храната дополнително ги советува потрошувачите да не ги јадат овие чоколади и за било каков проблем да се обратат до тимот за заштита на потрошувачи на компанијата Марс. Наредбата зa повлекување е за производите со рок на трање помеѓу 19 јуни 2016 година и 8 јануари 2017 година. Од централата во Америка, соопштија дека можеби наведените рокови не се исти во сите земји, но овој долг период на рокови е избран за да бидат сигурни дека сите потенцијално спорни производи ќе бидат повлечени. Има ли во Македонија од спорните чоколади? И додека во европските земји и покрај тоа што компанијата Марс засега не  е  стопроцентно сигурна дека во сите пратки со овој рок има пластика, сите производи веќе се повлекоа, македонската Агенција за храна и ветеринарство смирува дека сеуште нема добиено преку Системот за брзо предупредување за храна и храна за животни на Европската Унија, дека овие чоколади се небезбедни. -Агенцијата е во тек и ги следи информациите за повлекувањето на дел од овие производи од германскиот пазар од страна на компанијата производител, поради појава на пластика во производите. Доколку  добие нотификација преку Системот за брзо предупредување за храна и храна за животни (Rapid Alert System for Food and Feed) на Европската Унија дека небезбедни производи од овој производител се наоѓаат на македонскиот пазар, Агенцијата за храна и ветеринарство ќе постапи соодветно и истите ќе ги отстрани од пазарот, се вели во соопштението од АХВ. Потрошувач во Германија најде црвена пластика во чоколадото „Сникерс” Повлекувањето на чоколадите  доаѓа откако потрошувач во Германија нашол црвена пластика во чоколадото Сникерс, која како што посочија од странските агенции за храна може да предизвика гушење. Како што пренесуваат странските медиуми, производот бил веднаш вратен во фабриката во Холандија. Од фабриката „Марс” Холандија посочија дека не можат да бидат сигурни дали сите производи имаат пластика, но заради безбедноста на потрошувачите ги повлекуваат сите. Тие посочуваат дека се во постојана комуникација со холандската Агенција за храна.Упатија извинување до сите потрошувачи и апел доколку некој има проблем да се јави во фабриката. -Ние не можеме да бидеме сигурни дека оваа пластика беше само во тоа чоколадо Сникерс. Ние сакаме нашите производи на пазарот, кои не можат да ги исполнат нашите барања за квалитет да се повлечат, па затоа решивме сите да ги повлечеме, посочуваат од фабриката „Марс” во Холандија. Американската компанија Марс е една од најголемите светски компании за храна, производство на  29 чоколадни брендови, вклучувајќи М & М, Галаксија, Твикс, Баунти и Малтесерс. Таа, исто така ги произведува и мастиките за џвакање Вригли, ориз чичко Бен Рајс, Долмио сос за тестенини и храната за домашни миленици Педигре. Компанијата е една од најголемите приватни претпријатија во САД која лани има приход од продажба од 33 милјарди долари. Колку губат компаниите? Од американската компанија „Марс” засега не соопштуваат колкави количини ќе бидат повлечени и колкава ќе биде финансиската загуба. Дел од странските бизнисмени изјавуваат дека често пати се случува да стигнуваат поплаки и жалби од потрошувачите и некогаш тие се вистински но некогаш лажни. Потегот за повлекување на производи може да доведе до нарушување на репутацијата на компаниите, како што тоа се случи лани со компанијата Нестле која ги повлече производот Маги тестенини во Индија во кој беше пронајден високо ниво на олово.Слично доживеа и компанијата „Кедбери” во 2006 година кога еден милион чоколади поради салмонела, компанијата имаше финансиска штета од 20 милиони фунти. Каде исчезна листеријата? Во Македонија и по две години остана енигма како дојде бактеријата листерија во вакумиран свински врат од еден производител. Прво надлежните посочија дека е пронајдена бактеријата во производот, па потоа дека резултатите се негативни. Министерството за здравство објави дека е детектирано присуство на листерија во сецкан свински врат земен од малопродажен објект во Гевгелија, а Агенцијата за храна и ветеринарство посочи дека не е утврдено присуство на бактеријата во сите мостри кои биле земени од компанијата. Во меѓувреме додека надлежните дебатираа за методите за испитување, од бактеријата починаа четири лица. Министерството за здравство поднесе кривична пријава против непознат сторител за пуштање во употреба на производи заразени со бактеријата листерија. Потоа Комисијата  за заразни болести утврди дека кај еден од производите е најдена бактеријата листерија, а истата бактерија подоцна  беше пронајдена и кај други производители. Т.С