БЕЗЖИВОТНИТЕ ТЕЛА НА СЕМЕЈСТВОТО ПАЦОЛИ СЕ ПРОНАЈДЕНИ, ИЗВЛЕЧЕНО Е И ВОЗИЛОТО: Трагично заврши потрагата во Лепенец

Добивај вести на Viber

По повеќе од 24 часа од вчерашната сообраќајна несреќа што се случи во близина на граничниот премин Блаце, пронајдени се безживотните тела на патниците во возилото марка БМВ, а од водите на реката Лепенец извлечено е и возилото, потврди официјално МВР.

-Министерството за внатрешни работи ја информира јавноста дека денеска (18.06) од страна на полициски службеници од Специјалната антитерористичка единица Тигар во реката Лепенец  се пронајдени починати трите лица по кои се трагаше по вчерашната сообраќајна несреќа на патот Скопје –ГП Блаце. Пронајдено е и возилото „БМВ“ во кое тие се превезувале. Како што веќе претходно информиравме, по наредба на јавен обвинител, возачот на возилото „фолксваген туран“ Б.Б. е лишен од слобода и задржан за понатамошно постапување, соопштија од МВР.

Во возилото БМВ се превезувале четворица патници, односно сите членови од семејството Пацоли, инаку државјани на соседно Косово.

По несреќата набрзо е извлечен само еден од синовите, 21-годишниот Ш. Пацоли, кој итно е пренесен во ГОБ „8 Септември“ и е сместен на Одделението за Трауматологија.

Во текот на денот, како што за Фактор потврди директорот на градската болница, д-р Христијан Костов, младиот пациент не е во животозагрозувачка состојба, иако има огреботини и набиеници по телото, но е во шок по несреќата.

Се очекува во текот на утрешниот ден да биде пуштен на домашно лекување, а треба да го преземат блиски роднини од Косово.

ФОТО: ФБ/21Тв