Бизнис климата во Македонија идеална за развој на микро, мали и средни претпријатија

Добивај вести на Viber

Микро, малите и средните претпријатија се мотор на економиите во развиените земји. Тие се важна алка во општествата затоа што создаваат можности за вработување и се клучни чинители на добросостојбата на локалните и регионалните заедници. Кои се факторите кои се значајни за нивниот раст и развој во РМ, како и кои се можностите кои им стојат на располагање за подобрување на бизнис климата на микро, малите и средните претпријатија, се прашања кои ги разгледавме со г-ѓа Пенка Мукаетова од Консалтинг Интер Груп. Тие се дел од проектот на УСАИД за развој на деловниот екосистем.

Консалтинг Интер Груп е дел од Проектот на УСАИД за развој на деловниот екосистем (Business Ecosystem Project - BEP), спроведуван од Паладиум Интернешнл. Која е целта на овој проект?

Консалтинг Интер Груп во својство на консултантска компанија со докажани експертиза и способности во областа на стратешко бизнис планирање, финансиски анализи и финансиско инженерство, е дел од овој Проект чија главна цел е трансформирање и унапредување на конкурентноста на микро, малите и средните претпријатија (ММСП) во Македонија преку зајакнување на бизнис услугите, финансирањето и пазарните врски, со цел поттикнување на значителен раст во продуктивноста и бројот на работни места во ММСП.

Каква е бизнис климата и перспективите за развој на микро, малите и средните претпријатија во РМ?

Моменталната бизнис клима е исклучително поволна за ММСП во Р. Македонија. Проектот на УСАИД е важен инструмент кој им стои на располагање за подобрување на нивната перспектива за развој, од причина што консултантската асистенција која тој ја овозможува, го гарантира успешниот пристап до финансии, а согласно индивидуалните потреби на претпријатијата.

Кои се според Вас решенија кои ќе овозможат процес на развивање стратегии за раст и експанзија кај микро, малите и средните претпријатија во Република Македонија? Кои се клучните фактори кои може да влијаат врз растот на овие претпријатија?

Пред да се започне со размислување за развивање стратегии за раст и експанзија кај ММСП во Р. Македонија, значајно е добро да се познава нивната моменталната состојба. Тука ние како консултанти ја играме клучната улога. Нашата стручност, но и објективност, ни дозволува од вистински агол да ја погледнеме состојбата на претпријатието во прашање, правилно да ги процениме факторите кои ќе мора да се разгледаат при движењето кон експанзија и соодветно на тоа, да се оформи и пристапот и начинот на работа.

Токму пронаоѓањето на решенија кои ќе овозможат развивање стратегии за раст и експанзија кај ММСП во Р. Македонија е еден од главните сегменти на овој Проект. Така, дел од активностите кои се преземаат вклучуваат:

• Идентификување на нивните финансиските потреби за раст, преку анализирање на нивниот постоен бизнис модел, производство, бизнис процеси итн.;
• Детерминирање на постојните кредитоспособност и атрактивност за добивање финансирање;
• Идентификување и планирање на инвестициски потреби;
• Преземање активности на финансиско инженерство;
• Поддршка во процесот на презентација на плановите и финансиските потреби пред локални банки и други финансиски институции, кој процес би резултирал со пристап до финансии.

Фактори кои секогаш придонесуваат кон растот на претпријатијата се нивните иновативни решенија, подготвеност за адаптација кон променливите пазарни услови и волјата да се инвестира во напредок.

Во развиените земји микро, малите и средните претпријатија се ’рбетниот столб на економијата. Ако направиме паралела со Македонија, каква е нивната кондиција во однос на македонската економија? Колку овие претпријатија се значајни за економијата?

Овие претпријатија се екстремно важни за нашата економија, бидејќи истата е нераскинливо зависна од нивната успешност. ММСП се процентуално најзастапени во Република Македонија, и оттука произлегува и потребата истите да функционираат добро, самостојно и со тенденција на раст.

Од таа причина, силно ги охрабрувам сопствениците на ваквите претпријатија, да ги искористат поволностите кои ги нуди овој Проект.

Кои извори на финансирање микро, малите и средните претпријатија можат да ги искористат?

Во Р. Македонија постојат бројни извори на финансирање кои ММСП можат и треба да ги искористат за да го развијат обемот и квалитетот на својот бизнис. Тие извори се како традиционални, на пример банки и штедилници, така и алтернативни, на пример факторинг компании и бизнис ангели.

Кој финансиски продукт претпријатијата ќе го искористат зависи пред сè од нивните индивидуални потреби и идеи, а по консултација со нас и по извршената анализа на резултатот кој се претендира да се постигне.

Колку правната и политичка регулатива во РМ создава можности и ограничувања за овој тип на компании?

Правната регулатива и политичката состојба во земјата се секако фактори кои влијаат врз условите за раст и развој на ММСП, а особено врз нивната подготвеност за инвестирање и преземање нови деловни потфати. Меѓутоа, сметам дека токму постоењето и имплементацијата на Проектот на УСАИД се силен доказ дека во моментов можностите се отворени и поволни за овие претпријатија, кои треба да ја искористат шансата за консултантски поткрепен чекор кон посеопфатна пазарна позиција.