Бројот на жртви од поплавите во Тексас се искачи на 27, меѓу кои девет деца и директорот на детски камп

Добивај вести на Viber

Бројот на жртви од поплавите во Тексас се искачи на 27, меѓу кои и девет деца, соопштија локалните власти. Се додава дека потрагата продолжува, пренесува АП.

Властите претходно соопштија дека најмалку 24 лица се убиени, вклучувајќи повеќе од 20 девојки кои престојувале во летен камп.

Меѓу жртвите е и Џејн Рагсдејл, директорка и ко-сопственичка на детскиот камп за девојчиња „Харт О'д Хилс“ во градот Хант.

Во округот Кер, Тексас, досега се спасени или евакуирани повеќе од 230 луѓе, соопштија властите.

Многу од нив беа спасени со хеликоптер, бидејќи во делови од регионот врнеа дождови што се случуваат еднаш на 100 години.

Во меѓувреме, потрагата по повеќе од 20 девојчиња кои сè уште се водат како исчезнати од Кампот Мистик, приватен летен христијански камп лоциран покрај река која се искачила за повеќе од шест метри за помалку од два часа, продолжи.

Гувернерот на Тексас, Грег Абот, прогласи вонредна состојба порано денес поради поплавите во централниот дел на земјата во кои загинаа 24 лица, а повеќе од 20 се водат како исчезнати, а американскиот претседател Доналд Трамп ги нарече поплавите „ужасни“ и вети федерална помош.

Вонредна состојба е прогласена во неколку окрузи во Централен Тексас, вклучувајќи ги окрузите Бандера, Комал, Кончо, Гилеспи, Кендал, Кер, Кимбал, Љано, Мејсон, Мекалоу, Менард, Ривс, Сан Саба и Том Грин.

Претседателот на Соединетите Американски Држави, Доналд Трамп, денес изјави дека неговата администрација соработува со државните и локалните власти на терен во Тексас за да одговори на поплавите во кои загинаа најмалку 27 лица, додека десетици сè уште се водат како исчезнати, и дека тој и првата дама на Соединетите Американски Држави се молат за сите семејства погодени од оваа ужасна трагедија.

Како што напиша на социјалната мрежа Truth Social, секретарката за внатрешна безбедност, Кристи Ноем, наскоро ќе биде во Тексас.