Бугарија го фаќа последниот воз, во четврток го потпишува договорот за „Јужен тек“

Добивај вести на Viber

Бугарија ќе го потпише договорот за проектот „Јужен тек“ во четврток, 15-ти  ноември. Ова го изјави претседателот Росен Плевнелиев по средбата со министерот за економија, енергетика и туризам Делјан Добрев, на која и двајцата разговарале за условите од договорот, пренесуваат бугарските медиуми. Средбата беше иницирана, откако за време на викендот претседателот изјави дека се надева на поголема транспарентност за „Јужен тек“. „Сметам дека Владата треба да ги искористи следните денови, за да даде доволно  факти, бројки и податоци, со што ќе се постигне многу поголема транспарентност во однос на тоа што ќе се потпишува со Русија“, изјави Плевнелиев.  По средбата со Добрев тој посочи дека го поддржува проектот, но е важно Владата добро да го осмисли. Првично потпишувањето на договорот за „Јужен тек“ беше закажано за 9-ти ноември. Поради смртта на патријархот Максим, тој ден беше прогласен за жалост што ги одложи плановите на бугарската влада. Затоа сега договорот ќе биде донесен во последниот рок, согласно потпишаниот  меморандум во месец август меѓу „Бугарски енергетски холдинг“(БЕХ) и „Газпром“. Тогаш двете страни се договорија одлуката да биде донесена најдоцна до15-ти ноември. Ако тоа не се случи во овој рок, БЕХ ќе мора да го врати договорениот попуст на цената на гасот, кој беше издејствуван во текот на пролетта. Сепак по направените пресметки станува јасно дека попустот всушност се проценува на 70 милиони долари, наместо првично најавените од Владата, 120 милиони долари. Во четврток треба да биде потпишан и друг важен документ за Бугарија - новиот договор за набавка на гас по 2013 година. Ова прашање беше исто така било разговарано на средбата меѓу Плевнелиев и Добрев. Според Претседателот, за него е важно крајните корисници во Бугарија, оние кои ги плаќаат сметките за парно, како и претпријатијата кои користат гас да бидат информирани за цената, за да можат да планираат.