Добивај вести на Viber
Богатството на индиските милијардери почна да се топи. Како што пренесува „Блумберг“, најбогатиот човек во Индија, Мукеш Амбани, истовремено е и најголем губитник во земјата.
По падот на индиската рупија во однос на американскиот долар, неговото богатство се намалило за дури 24 проценти. Валутата достигна рекордно ниско ниво од 64,55 рупии за долар. Мукеш Амбани, кој е претседател на најголемата рафинерија за нафта во светот Reliance Industries, изгуби 5,6 милијарди долари од благосостојбата од 1 мај наваму.
Амбани има нето богатство во вредност од 17,5 милијарди долари според индексот на милијардери на “Блумберг”.
Тој сепак не е единствениот губитник меѓу индиските милијардери. Помалиот брат Анил Амбани поседува богатство од 6,30 милијарди долари и е осми по богатство во земјата, според рангирањето на “Блумберг”. Тој од своја страна изгуби 17% од своето богатство, односно 1,3 милијарди долари.
Дилип Шангхиви, кој е основач на најголемиот производител на лекови во Индија, Sun Pharmaceutical Industries, изгубил 2 милијарди долари. Тоа го прави втор најголем губитник меѓу индиските милијардери. Тој поседува богатство од 10,2 милијарди долари.
Претседателот на Aditya Birla Group, Кумар Мангалам Бирла, изгуби околу 950 милиони долари или околу 11% од нето богатството, од месец мај.