„Човек кој никогаш не бил министер го презема раководството на првата европска сила“: Кој е Фридрих Мерц, идниот канцелар на Германија?

Добивај вести на Viber

Често окарактеризиран како „човек од минатото“, новиот иден канцелар на Германија Фридрих Мерц буди големи надежи кај неговите европски сојузници, кои цврсто сметаат на поддршката на Германија во светот нарушен од Доналд Трамп.

Конзервативниот политичар (69), чија група ЦДУ/ЦСУ победи на парламентарните избори на 23 февруари, ја помина клучната фаза во неговата кандидатура за челната функција по денешната објава за коалициски договор со левиот центар за формирање влада.

Патот беше долг за адвокатот со обука, кој беше соборен од власт во раните 2000-ти од Ангела Меркел, додека тој се сметаше себеси за природен наследник на Хелмут Кол, таткото на германското обединување.

Човек кој никогаш немал министерска позиција го презема раководството на највисоката европска сила во време на геополитички превирања, додека Европа се обидува да се ослободи од военото покровителство на сè понепредвидливиот американски сојузник за да обезбеди сопствена одбрана од руската закана.

Иако беше убеден атлантист, тој вети дека ќе ја врати својата земја во центарот на европското прашање со силен глас во одбрана на интересите на континентот, исто така погоден од трговската војна на Трамп.

Како недвосмислен поддржувач на пружањето помош за Украина, тој го привлече вниманието објавувајќи веќе во март со неговите владејачки партнери Социјалдемократите (СПД) досега невидена програма за трошење од неколку стотици милијарди евра за повторно вооружување и модернизација на Германија, која досега беше многу посветена на одржување на буџетската дисциплина.

Неделникот Економист во многу пофален едиторијал напиша дека тоа е „фантастичен почеток за Фридрих Мерц“.

Но, храброста што на овој милионер и пилот аматер ги носи пофалбите на европските сојузници во оваа фаза во Германија, предизвикува критики и незадоволство.

„Никогаш канцелар не го започнал својот мандат со толку ниска доверба“ кај населението, изјави за Франс прес професорот по политички науки на Универзитетот во Касел Волфганг Шредер, осврнувајќи се на новите анкети.

Многумина, вклучително и во неговите редови, го критикуваат дека ветил дека ќе го реформира „замрзнувањето на долговите“ напишано во уставот, односно механизмот што го ограничува капацитетот на земјата за задолжување и инвестирање.

Тоа ѝ дава материјал на екстремно десничарската Алтернатива за Германија (AfD), која ја осудува неговата „лага“ и заостанува зад конзервативците на анкетите.

„Многу ќе зависи од способноста на Фридрих Мерц да ја продаде идејата дека „безбедноста сега е апсолутен приоритет“ и дека позајмувањето за неа е „неизбежно““, рече политикологот Урсула Мунк од Универзитетот во Туцинг.

За време на предизборната кампања тој вети јасна промена надесно доколку стане канцелар со заострување на миграциските регулативи по неколку смртоносни напади во кои беа вклучени странци.

Од неговиот избор за шеф на Христијанско-демократската унија (ЦДУ) во 2022 година, тој најави целосен пресврт на дарежливата политика за прифаќање мигранти на Ангела Меркел (2005-2021).

Тоа беше одмазда за Ангела Меркел што го собори во 2002 година од функцијата претседател на парламентарната група на ЦДУ, што го натера да се префрли на финансии во 2009 година во BlackRock, една од најголемите светски групи за управување со средства.

Според него, само рестриктивната политика во однос на мигрантите може ефективно да ја запре AfD, основана во 2013 година со поранешни кадри на ЦДУ, со кои тој исклучи каква било соработка и покрај поканите на Трамп и соработниците на Трамп.

Човекот кој вети дека ќе ја врати гордоста на Германија, исто така, ќе мора да најде начин да ја реши длабоката криза на индустрискиот модел низ кој минува земјата, што може дополнително да се влоши со новите царини од Трамп.

Мерц е убеден либерал и пред се сака да ги намали корпоративните даноци и бирократијата.

„Многумина во ЦДУ мислат дека Мерц и Трамп би можеле добро да се сложуваат. Мерц ги познава САД, тој направи кариера во приватниот сектор, па затоа е бизнисмен, што би можело да му се допадне на „креаторот на зделки“ во Белата куќа“, пишува магазинот Шпигел.

Фото: EPA-EFE/CHRISTOPH SOEDER