„ДАЛИ ДРАНГО ИМА ЗАБРАНА ЗА КОРИСТЕЊЕ ОРУЖЈЕ?“: Анима Мунди бара детална истрага за сликите со мечката

Добивај вести на Viber

По објавата дека заменик директорот на Македонија пат, Сашо Дранго е сликан со убиена мечка, случај за кој Битолското обвинителство оформи предмет, и за кој се огласи самиот Дранго посочувајќи дека мечката не ја убил, туку згинала по удар во сообраќајна несреќа, со остра реакција од здружението за заштита на животните „Анима Мунди“. 

- Веста дека од страна на Битолското обвинителство е отворен предмет за фотографијата на заменик директорот на Македонија пат, Сашо Дранго, сликан со застрелана мечка, животно со највисок степен на заштита во Македонија е добар чекор кон разрешница, доколку сакаме да се наречеме правна држава - посочуваат од здружението. 

Сепак, од таму укажуваат дека „преку дадените изјави, Сашо Дранго ја инволвира и институцијата во која е функционер, како и луѓето кои работат таму, а кои нема да дозволиме да послужат како параван“.

- Имајќи предвид дека во билтенот на МВР не постои податок на сообраќајна несреќа со мечка за месец декември, како и дека во случај на таква постапка има строго дефинирана процедура согласно Законот за дивеч и ловство и Законот за заштита и благосостојба на животните – не смее да се постапува без МВР; како и дека мечката не е на пат туку во шума, и дека волку големо животно нема начин да се поместува за сликање, освен доколку е свежо убиено, невкочането (се уште топло), очекуваме брзо согледување на реалната состојба, брзо постапување и најстрога казна - нагласуваат од здруженеито. 

Притоа бараат да се провери дали во месец декември постои пријава за убиство на мечка во некоја од надлежните институции или пак ОЈО. И прашуваат, дако има пријава, дали службеници од МВР и пратеници се труделе да го сокријат случајот?

- Воедно бараме од министерот за внатрешни работи да провери и информира јавноста, дали Дранго кој на сликиве го гледаме во ловечка униформа, наоружан со снајпер и двоглед, има забрана за користење оружје и истото му е одземено во предходна постапка, т.е. дали овој снајпер кој го гледаме сите е држен спротивно на закон? - заклучуваат на крајот од „Анима Мунди“. 

Здружението вчера објави фотографии од земеник директорот сликан со убиената мечка, што ја разбранува јавноста, но поттикна и реакции од обвинителството.

Фото: Анима Мунди