ИЛОН МАСК ДОБИ СЕРИОЗНО ПРЕДУПРЕДУВАЊЕ ОД ГЕРМАНСКИОТ ВИЦЕКАНЦЕЛАР: Рацете подалеку од нашата демократија

Добивај вести на Viber

Германскиот вицеканцелар Роберт Хабек го предупреди американскиот милијардер Илон Маск да не се меша во претстојните германски избори и го критикуваше неговото неодамнешно отворено поддржување на крајнодесничарската Алтернатива за Германија (AfD).

„Рацете подалеку од нашата демократија, господине Маск!“ изјави Хабек за списанието Шпигел, на прашањето дали Маск претставува закана за Германија.

- Комбинацијата на огромно богатство, контрола врз информации и мрежи, користење на вештачка интелигенција и непочитување на правилата е фронтален напад врз нашата демократија, додаде Хабек.

Тој истакна дека Маск, кој се смета за советник на новоизбраниот американски претседател Доналд Трамп, прави сè за да ги спроведе своите интереси.

Маск, познат по своите провокативни објави на неговата социјална мрежа Икс, веќе неколку дена предизвикува немир во германската политика.

За време на викендот, тој ја поддржа АфД со обемна статија објавена во весникот Велт ам Зонтаг пред изборите закажани за 23 февруари.

Хабек ги нарече ставовите изнесени во статијата „ужасни“ и предупреди да не се потценуваат обидите на Маск за влијание врз германската политика.

„Најбогатиот човек во светот, кој поседува една од најмоќните комуникациски платформи, отворено поддржува партија која делумно е крајнодесничарска. Не треба да направиме грешка и да го игнорираме ова, потенцираше Хабек.

Германската БфВ агенција за домашно разузнавање ја следи АфД како сомнителна крајнодесничарска група, а неколку регионални организации на партијата веќе добија таква квалификација.

МИА