Дејвид Камерон е разочаран од бавниот напредок во преговорите за буџетот

Добивај вести на Viber

Британскиот премиер Дејвид Камерон  денеска изрази разочараност од малиот и бавен напредок во преговорите што во Брисел ги водат европските лидери, за новиот седумгодишен буџет на ЕУ.

Во изјава за телевизија Скај, Камерон рече дека „не е време за чепкање и мајсторисување со буџетот на ЕУ буџетот до 2020 година. - Тоа што сега ни е потребно тоа е неодложно кратење на буџетот, додаде тој.

Некои од европските лидери изјавија за британските медиуми дека спогодба околу ова прашање, сепак е можна, иако германскиот канцелар Ангела Меркел веќе навести дека можеби ќе биде потребен уште еден самит, најверојатно во јануари, за да се донесе новиот европски буџет.

Велика Британија инсистира на замрзнување или скратување на буџетот, како и на редуцирање на админстрацијата на Европската комисија за која се трошат „премногу пари“. Британската делегација на Самитот предупредува дека неможе да има раст на буџетот што ќе оди одново за аграрниот сектор. Британските дипломати сметаат дека ако воопшто има зголемување, тоа мора да биде насочено само во развојот и во новите технологии.

Според британските медиуми преговорите околу компромисот поминуваат во „пазарење“ меѓу земјите членки и нивните лидери, па Франција веќе најави дека нема да дозволи намалување на буџетот за аграрот, додека Велика Британија предупредува дека нема да се согласи со намалување на рибејтот (враќање на дел од парите што Лондон ги дава за ЕУ буџетот, затоа што користи малку средства за субвенции во аграрот).

Поранешниот белгиски премиер Гај Верховстад изјави за Скај дека има разбирање за барањето на Владата во Лондон за намалување на трошоците во ЕУ, откривајќи дека Унијата има двапати повеќе дипломати од САД и трипати повеќе војска, но смета дека британското притискање за намалување на буџетот е претерано. Предложеното зголемување чини само 50 пени по човек на ден, за секој жител на ЕУ.