Дерковски: Ако нема цензус, најверојатно ќе нема веднаш нови избори
Објавено во: Македонија 23 Април, 2019
Оливер Дерковски, претседателот на Државната изборна комисија, изјави дека не верува дека ќе се распишат нови претседателски избори доколку во вториот круг на 5 мај не се постигне потребниот цензус од 40 отсто излезеност на гласачите.
Според Дерковски, доколку власта реши да го менува Уставот, избори нема да се распишат за кои и онака немало прецизно утврден рок кога да бидат следните.
-Ако се закажат избори ќе треба да се почека да завршат тие избори, па после да се премине кон таква една постапка, ако владејачкото мнозинство има таква намера. Недореченоста во законските одредби, на пример членот 122 во Изборниот законик кој ја уредува таа обврска, вели само дека се одржуваат нови избори, ама нема ни кога ни рок. Тоа дава можност за шпекулации од овој вид. Нормално би било веднаш по објавување на конечните резултати на Државната изборна комисија да се распишат нови избори и да се оди во организација на нови избори. Сметам дека владејачкото мнозинство доколку се одлучи на промена на Уставот со кој Претседателот ќе се бира во Собранието, веројатно тоа ќе го прави пред распишување на нови избори, вели тој за ТВ Алфа.
Во моментов и самата власт остави можност шефот на државата да се избира во Собранието или да се отстрани цензусот како услов. За тоа ќе биде потребно согласност од двотретинско мнозинство во Собрание.