Димитров: Добро е што „Рекет“ излезе на виделина
Објавено во: Македонија 26 Август, 2019
Никола Димитров, министерот за надворешни работи, за случајот „Рекет“ вели дека е добро тоа што овој скандал „излегол на виделина“ и дека истиот не бил сокриен под тепих.
- Со сите грешки што ги правиме секојдневно како Влада и како општество, еве како член на Влада да бидам искрен, имаме очигледен демократски пресврт. Со сите наши маани и грешки, дури и овој последен случај докажува дека никој не треба да биде над законот и дека вообичаениот инстинкт традиционално да ги пикаме под ќилим скандалите кои не ни одговаараат. очигледно веќе не функционира. Решавање на еден проблем започнува со излегување на тој проблем на виделина. Еден амбасадор од земја-членка на ЕУ вели: „Никола секаде има корупција и добро е кога таа ќе излезе на виделина. Вистинскиот тест е што ќе направите, што ќе направи системот!“, истакна Димитров.
Ова шефот на македонската дипломатија го истакна на состанокот со македонските амбасадори и најави дека донесувањето на законот за јавно обвинителство и водењето транспарентна, непристрасна истрага за случајот „Рекет“ ќе помогнат Македонија да добие датум за почеток на преговорите со ЕУ во октомври.
Амбасадорски совет се одржува на тема „Европската перспектива на Република Северна Македонија“, а овој дводневен состанок го организира МНР.