Димитров заедно со шефовите на дипломатиите од Западен Балкан на состанок во Сараево

Добивај вести на Viber

Шефот на македонската дипломатија Никола Димитров, заедно со шефовите на дипломатиите на земјите од Западен Балкан,  Албанија, Босна и Херцеговина, Црна Гора, Косово и Србија, денес ќе учествува на Состанокот на Министри за надворешни работи на земјите од Западен Балкан и министерската конференција за Фондот за Западен Балкан.
 
На состанокот планирано е да се разговара за Стратегијата за проширување на ЕУ во Западен Балкан, за резултатите од самитот во Трст, нивната досегашна имплементација  како и за на претстојниот самит за Западен Балкан во рамките на Берлинскиот процес што на 9 и 10 јули ќе се одржи во Лондон.

Ова е втор ваков министерски состанок во рок од еден месец. Претходниот беше одржан во Софија.Покрај министрите за надворешни работи од земјите од Западен Балкан, на состанокот,  ќе учествуваат и заменик-премиерот и министер за надворешни работи на Бугарија, Екатерина Захариева, државниот министер за Европа и Америка на Обединетото Кралство на Велика Британија и Северна Ирска, сер Алан Данкан, генералниот директор во Европската комисија, Кристијан Даниелсон, генералниот секретар на Советот за регионална соработка, Горан Свилановиќ.

За време на престојот во Сараево, Димитров ќе земе учество и на конференцијата Bergedorf Round Table, која оваа година се организира на тема „Долгиот пат кон Европа: Западен Балкан меѓу домашните предизвици и геополитиката“, а на која ќе учествуваат високи владини претставници и меѓународни експерти.