Директорите на Скопски пазар на суд за сомнително купување сопствени акции

Добивај вести на Viber

Основниот суд Скопје 1 треба да одлучи дали ќе има обвинение со кое ќе бидат опфатени неколкумина членови на раководството на Скопски пазар, меѓу кои и првиот човек на фирмата, Сашо Давитковски. Според информации од Судот, за една до две недели ќе биде изготвено решението со кое ќе се знае дали актот ќе стане правосилен и дали потоа ќе следува судски процес за милионски криминал со акции на компанијата, објави „Судство.мк“.

Јавното обвинителство цели два часа изнесувало докази со кои го поткрепува обвинителниот акт, а обвинетите и адвокатите изнеле своја одбрана. По спротивставените аргументи, Советот на судот ќе оцени дали Јавното обвинителство има издржан акт.

Како што известија медуимите, повикувајќи се на јавно објавени документи на компанијата, Скопски пазар во 2007 потрошил значаен износ на парични средства за откуп на сопствени акции, за непосредно по нивното купување – да ги повлече.

Собранието на акционери на Скопски пазар на иницијатива и со поддршка на раководството на компанијата во два наврати во периодот 2006-2007 година повлекло вкупно 14.522 сопствени акции, кои што самата компанија претходно ги купила на пазарот за повеќе од 85 милиони денари.

Ова планско купување сопствени акции со единствена цел да се повлечат, според експертите, е дискутабилен потег на раководството на Скопски пазар, за кој нема економска оправданост.

Пријавата против неколкумина членови на раководството на Скопски пазар, меѓу кои и првиот човек на фирмата, Сашо Давитковски, е од „Современ дом“ Прилеп, кој што е еден од најголемите акционери во АД Скопски пазар.

Според упатените во работата на Скопски пазар, тешката состојба во компанијата денес е резултат на ваквите и слични потези на раководството во минатото. Изминативе месеци Скопски пазар беше актуелен во јавноста откако стана јасно дека компанијата има потешкотиите да обезбеди плата за вработените, а директорите продадоа или издадоа десетици атрактивни недвижности на компанијата за да ги отплаќаат милионските долгови.