Добиваше милионски тендери, а сега државата му ја одзема лиценцата на „Тритерол Петрол“

Добивај вести на Viber

Регулаторната комисија за енергетика започна постапка за одземање на лиценца на Тритерол Петрол Скопје, трговецот на големо со дизел, биодизел, бензин, екстра лесно масло и течен нафтен гас.

Од РКЕ објаснуваат дека компанијата на Љупчо Пецов во декември при надзор од Државниот пазарен инспекторат не поседувала оперативни резерви на нафта и нафтени деривати. Во меѓувреме Тритерол Петрол Скопје не поднел приговор на оваа одлука, а регулаторот за да ја сопре постапката му доделува рок да поднесе доказ дека има резерви.

„Се задолжува носителот на лиценцата на Друштвото за производство, трговија и услуги Тритерол Петрол Дооел Скопје, во рок од 60 дена од денот на прием на оваа одлука да ги превземе сите потребни активности заради отстранување на причините поради кои е започната постапката за одземање на лиценцата и во истиот рок да достави доказ - Записник од Државен пазарен инспекторат на Република Северна Македонија, дека поседува оперативни резерви на нафта и нафтени деривати“, се вели во одлуката на РКЕ.

Државниот пазарен инспекторат на 17 декември ја утврдил состојбата, а на 5 јануари го известил регулаторот.

Пред нешто повеќе од две години засегнати установи испратија пријава до ДПИ дека „Тритерол петрол“ им доставува нафта за греење со сомнителен квалитет, односно неквалитетно екстра лесно гориво, наменето за греење на ученици, студенти и административни работници.

Во 2014 во случајот „Керозин“ семејството Пецови од Неготино беше осудено дека како злосторничка група преку неготинската фирма „Алма-комерц“ точеле помало количество нафта во институциите отколку предвиденото со договорите за јавни набавки и со тоа ja оштетиле државата за три милиони евра.

Годинава „Тритерол Петрол Скопје“ склучи повеќе договори со државни институции за набавка на масло за горење, а на 18 февруари го доби тендерот од Општина Штип од 2,5 милиони евра за набавка на нафта за греење на зградата на локалната самоуправа, основните и средните училишта и градинките.

А.К.