Домашните градежници бараат од „колачот“ за новиот Клинички центар

Добивај вести на Viber

И домашните градежни компании треба да се офајдат од изградбата на новиот Клинички центар, а не тој голем финансиски колач да им се дава само на странците, побара од власта Синдикатот за градежништво, индустрија и проектирање. Според нив, ако овој „мрсен“ тендер се додели на фирма од земјава, од него корист ќе имаат македонските граѓани. Нашите фирми, сметаат од градежниот синдикат, имаат и капацитет и ресурси да изградат вакви објекти.

„Гранит“ и „Бетон“ во минатото граделе објекти од овој тип. Неприфатливо е проектот да биде даден на компанија надвор од државата, а градежните работници овде да останат без работа“, изјавија од Синдикатот.

За градежниот синдикат, не се прифатливи условите кои ги поставуваат Владата и Министерството за здравство, како што е оној компанијата која ќе конкурира на тендерот да има изградено таков или сличен објект во последните 10 години, како и компанијата да мора да приложи депозит од дури 250 милиони евра. За нашите градежни компании, велат, тоа е голема сума, која тие не можат да ја исполнат.

Неофицијални информации на синдикатот говорат дека се планира градежните компании од земјава да бидат заобиколени, бидејќи не ги исполнувале условите.

„Не треба тенденциозно да се прави тендер, за одредена компанија да ги исполни условите. Треба да бидат реални барањата во тендерите, а не баснословни суми. Нашите компании граделе надвор од државата и изградиле болници и клиники. Не е изводливо капитална инвестиција да ја дадеме на странска компанија. Треба да се даде на наша компанија и тука да останат парите“, предупредуваат од градежниот синдикат.

Изградбата на оваа голема инвестиција треба да стартува следната година, а се проценува дека сумата на тој голем објект ќе тежи 500 милиони евра. Новиот клинички центар ќе се гради во населбата Бардовци во близина на Психијатриската болница.