Државата проценува колку да му плати на „Макпетрол“ за да си оди од ГА-МА

Добивај вести на Viber

Вицепремиерот за економски прашања Кочо Анѓушев изјави дека државато во моментов преку Бирото за судски вештачења ќе проценува колку треба да му плати на „Макпетрол“ за да си замине, односно да го отстапи својот удел од ГА-МА.

Новиот Закон за енергетика предвидува сопственик или косопственик на преносниот гасоводен систем од Бугарија до Македонија да не смее и да не може да биде истовремено и сопственик на фирма која врши снабдување со природен гас, така што „Макпетрол“ мора да отпадне од оваа комбинација.

„Макпетрол“ треба да остане само снабдувач со гас, а во моментов во ГА-МА е заеднички сопственик со државата.

„Како што беше најавено и во текот на донесувањето на Законот за енергетика, потребно е да се направи проценка на вредноста на уделот на Макпетрол АД Скопје во АД ГА – МА и истата ќе биде изготвена од страна на Бирото за судски вештачења. Изготвувањето на проценката е веќе во тек и се работи на истата. Станува збор за комплексен процес. Колкав ќе биде износот и како ќе се плаќа ќе се дефинира по завршување на проценката, во следните години.“, изјави вицепремиерот Кочо Анѓушев.

Откако ќе биде завршена оваа постапка, државната компанија „Македонски енергетски ресурси“ (МЕР) треба да биде единствен сопственик на дистрибутивната мрежа на гас.