Државата трие раце, ќе се опари и од други ТИРЗ-овци

Добивај вести на Viber

Покрај Џонсон Мети, и на други странски инвеститори од технолошко-индустриските развојни зони им истекуваат „привилегираните“ рокови и се очекува да започнат со плаќање на данокот на добивка, како и другите законски обврски кои што им следуваат истовремено со завршувањето на почетните договори за државна помош 

Џонсон Мети од Бунарџик е убедливо најдоходовен странски инвеститор во Македонија и еден од најголемите во Југоисточна Европа со чиста добивка од околу 100 милиони евра во 2017-та, но во блиска иднина има кандидати кои истовремено добро ја разработија својата дејност во Македонија и можат значително да ја полнат државната каса како што се Кемет електроникс, Дракслермаер и Кромберг и Шуберт.

Премиерот Зоран Заев веќе потврди дека во 2018-та произведувачот на катализатори за прв пат бил даночен обврзник.

- Една странска инвестиција, Џонсон Мети, која беше дого време поддржувана, повеќе не е поддржувана од државата и плаќа 30 милиони (евра) данок на добивка годишно, плаќа еден куп придонеси, данок на додадени вредности. Меѓутоа инвестицијата останува тука и сега ние ќе гледаме да биде профитабилна, да егзистира и понатаму, затоа што тоа е добро за Македонија, рече премиерот Зоран Заев во емисијата „24 Отворено“ неодамна.

Даночниот експерт Павле Гацов вели дека ова е само почеток и дека нови даночни обврзници од слободните зони ќе има и во 2019-та.

- Она што го плати Џонсон Мети е за сработеното во 2017-та, додека за 2018-та допрва ќе се утврдува колкава ќе биде сумата. Моите сознанија велат дека наплатата на данок на добивка и на персоналниот данок како обврска ќе ја имаат и други инвеститори оваа година, но неблагодарно би било да лицитирам уште сега со нивните имиња - вели Гацов.

Фисканиот расход на Џонсон Мети е една од причините за големата разлика во наплатата на данокот на добивка од страна на Управата за јавни приходи во текот на 2018-та во однос на една година претходно. Вкупната сума на данокот на добивка направи голема разика во вториот и третиот квартал, со дури 25 отсто повеќе собрани средства во однос на истиот период од 2017-та. Истовремено не е забележана многу поголема разлика во наплатата на персонаниот данок на доход, ДДВ и социјалните придонеси по првите три квартали од 2018-та споредбено со истиот период од 2017-та.

ТИРЗ-овите компании во изминатиот период беа привлечени од можноста извесен период да не плаќаат даноци, субвенционирањето на придонесите и платите на работниците, како и од други примамливи олеснувања.

A.K.