ДУИ за „меморандумот“ на Тошковски и Коцевски: Иронија и заробена држава

Добивај вести на Viber

Демократската унија за интеграција го осуди потпишувањето на меморандумот за соработка со заедничка фотографија на министерот за внатрешни работи Панче Тошковски и Љупчо Коцевски, во ситуација кога до пред извесно време против републичкиот обвинител се иницираше и водеше процедура од власта за негово разрешување.

„Вчерашната фотографија на Јавниот обвинител Коцевски и министерот за внатрешни работи Тошковски, како потпишуваат меморандум за соработка во борбата против корупцијата, беше горчлива иронија за правдата и симбол на заробена држава.

Наместо тоа ракување, таа сцена требаше да биде истражна постапка во која министерот за внатрешни работи дава отчет за неговата улога во трагедијата во Кочани. Повеќе од една година, ноќен клуб функционирал без лиценца, со целосно знаење на командниот синџир на локалната полиција.

И покрај внатрешните предупредувања за сериозни прекршувања – вклучително и присуство на малолетници, употреба на дрога и пиротехника – не беше преземено ништо. Таа негрижа доведе до трагична загуба на над 60 животи и повредување на над 200 лица.

Наместо да покаже чувствителност и да преземе одговорност, министерот Тошковски продолжува да ја избегнува секоја морална или правна одговорност. Ова однесување го зацврстува впечатокот за заробена држава, каде што правдата е селективна и политички контролирана“, стои во реакцијата на ДУИ.

Од партијата уште еднаш повторија дека за трагедијата во Кочани не смее да има селективна правда, алудирајќи на притворањето на поранешниот министер за економија од нивните редови Крешник Бектеши.