Џафери за инцидентот со Груевски: Нема казнени санкции за такво однесување

Добивај вести на Viber

Претседателот на Собранието Талат Џафери смета дека нема можност за некаква санкции кон Никола Груевски за тензиите и инцидентот кој се случи на денот на изгласување на Законот за употреба на јазиците. 

„Поради ова сметам дека не треба да се мисли во таа насока, бидејќи за пратениците единствена одговорност е моралната и политичката одговорност која се изразува на парламентарни избори. Јасна е сликата и која е казната за Никола Груевски на парламентарните избори во 2016 и на локалните избори во 2017“, посочува Џафери во интервју за „Гласот на Америка“.

Најавата на претседателот Ѓорге Иванов да не го потпише указот Џафери го оценува како неспроведување на уставните обврски.

„Уставот не остава можност за алтернатива дали ќе го потпише законот или не, туку тоа е обврска во согласнот на член 75 од Уставот. Моментално чекам да помине предвиденото време. Доколку во првиот случај предвидениот рок е седум дена, со аналогија и во овој сучај треба да е исто. А поради тоа што произлегува како обврска, и обврската нема рокови и Уставот не предвидува рокови за применување на истото. Значи дека тоа е негова обврска“, рече Џафери.

Во однос на инцидентот поттикнат од поранешниот премиер Никола Греувски во текот на гласањето на законот за јазиците, Џафери посочува дека според деловникот на Собранието не се предвидуваат некакви казнени санкции за однесувањето на пратениците во собраниската сала.

Во однос на тоа дека ВМРО-ДПМНЕ ќе покрене интерпелација  за него во однос на начинот на гласање за законот за јазици, Џафери вели дека ВМРО-ДПМНЕ го избрала медиумскиот пат за комуникација и дека во Собранието немаат поднесено никаков материјал во врска со тоа.

Во однос на заканувачките собири пред куќите на пратениците од СДСМ, Џафери смета дека во моментот кога правото за протест се претвара во насилство и го загрозува животот на некого тоа веќе не е протест.

„Тоа е казниво дело и е одговорност на соодветните институции, кои мора да го обезбедат животот и имотот не само на пратениците, туку и на секој граѓанин во Република Македонија“, вели Џафери во интервју за „Гласот на Америка„.

Според него овој начин на однесување може да има негативно влијание врз одлуките на Брисел за почнување на преговори со Македонија за членство во ЕУ.