Џиновите од малата Виница лани направија приход од 124 милиони евра

Добивај вести на Viber

Општина со 12.000 жители во источна Македонија има фирма за транспорт и трговија со деривати која оствари приход од 79 милиони евра, компанија за производство на ќерамиди која прави приход од 10 милиони евра и прехранбено-кондиторска индустрија што оствари приход од 30 милиони евра. Мала општина – големо економско чудо

Не не станува збор за некое мало место во Швајцарија. Станува збор за македонско градче на истокот располано под падините на Плачковица, познато по родните полиња, историската „виничка афера“ и античките теракоти. Виница е мало градче, но економски џин! Од аспект на приходите на неколку винички компании кои „жарат и палат“ и се солидно етаблирани во нашата национална економија. На „питомата“ Виница можат да и позавидат и многу поголеми градови.

Виница има повеќе компании, но четири фирми се доминантни во општинската економија. Тие компании лани заедно направиле кумулативен приход од 125 милиони евра. Општина Виница, реално, има околу 12.000 постојано жители. Значаен дел од нив се работно ангажирани во „Макпрогрес“, некоја од компаниите „Дади“ поранешен „Тондах“ и сегашен „Виенербергер“ и „Мебел Ви“.

Убедливо најголема компанија од аспект на остварени приходи е транспортната компанија „Дади Оил“ која се занимава со транспорт на нафтени деривати. Нејзиното седиште е во село Јакимово, населено место во општина Виница. Лани нејзиниот приход изнесувал 79 милиони евра, а добивката била 337.000 евра. Заедно со другите две компании „Дади компани СИМ“ и „Дади Компани“ фирма сопственик на другите две оваа групација има вкупен промет од 86 милиони евра и е убедливо најголема во виничката економија, а поголема е и од „Амфенол“ од Кочани најголемата компанија во тој регион (од Кочани до македонско-бугарската граница). Вкупниот профит на компаниите од „Дади“ е 800.000 евра.

„Макпрогрес“ е најголемата компанија со седиште во Виница, а воедно заедно со „Витаминка“ од Прилеп, една од двете најголеми македонски кондиторско-прехранбени индустрии. Оваа компанија чиј основач и сопственик е Александар Цветанов, е производител на брендовите „Винчини“ , „Сончева долина“ и „Армониа“, „Дониа“, „Фантазиа“ и „Натура“. Компанијата лани остварила приходи од 30,3 милиони евра и добивка од 1,6 милиони евра.

Најпрофитабилна виничка компанија е „Виенербергер“ поранешен „Тонах“ или винички “Пролетер“, компанија специјализирана за производство на керамиди и кровни покривачи. Лани оваа фирма остварила приход од 9,6 милиони евра  и профит од 2,8 милиони евра.

„Мебел Ви“ е еден од поголемите домашни производители на мебел. Лани оваа компанија , чиј сопственик е виничанецот Бранко Тасев, остварила приход од 4,7 милиони евра и добивка од 351.000 евра. 

Р.Ф.