ЕДЕН ДЕН ПРЕД ПОЧЕТОК НА ГРЕЈНА СЕЗОНА РКЕ ЌЕ ГИ РАЗГЛЕДУВА ЛИЦЕНЦИТЕ ЗА ПАРНО, ќе имаат ли Скопјани топли радијатори викендов?

Добивај вести на Viber

За денеска е закажана подготвителна седница на Регулаторната комисија за енергетика, на која ќе се разгледуваат одлуки за издавање лиценци за регулирано производство на топлинска енергија. Исто така на дневен ред е и одлука за лиценца за дистрибуција на топлинска енеригја како и лиценцата за снабдување со топлинска енергија .

Во одлуката за издавање лиценца за вршење на енергетска дејност регулирано производство на топлинска енергија е посочено дека на друштвото со ограничена одговорност основано од едно лице ЕСМ ПРОДАЖБА му се издава лиценцна за вршење на дејноста регулирано производство на топлинска енеригја.

-  Со Одлуката за наметнување обврска за обезбедување на јавна услуга за регулирано производство на топлинска енергија на подрачјето на Град Скопје, Владата на Република Северна Македонија на Друштвото со ограничена одговорност основано од едно лице ЕСМ ПРОДАЖБА ДООЕЛ Скопје му наметна обврска за обезбедување на јавна услуга за вршење на енергетска дејност регулирано производство на топлинска енергија за потребите на потрошувачите на дел од подрачјето на Градот Скопје за обезбедување на непрекинато функционирање на системот за топлинска енергија и заради сигурно, безбедно и квалитетно снабдување со топлинска енергија на потрошувачите на подрачјето на Град Скопје до 30 април 2023 година, ги пропиша условите што мора да ги исполни друштвото на кое му се наметнува обврска за јавна услуга и го задолжи да достави барање до Регулаторната комисија за енергетика да достави барање за издавање на лиценца за вршење на енергетска дејност регулирано производство на топлинска енергија и да поднесе докази за исполност на условите – се наведува во образложението кое на денешната седница на РКЕ ќе биде разгледувано од членовите на ова тело.

Во одлуката се посочува дека „ЕСМ ПРОДАЖБА ДООЕЛ Скопје ќе ја извршува дејноста регулирано производство на топлинска енергија со намален број на извршители во однос на просечниот број со кои во последните години успешно се извршуваше оваа дејност од технички аспект“. Заради ова, комисијата препорачува ЕСМ ПРОДАЖБА да го зголеми бројот на извршители на ниво на просечниот број во оваа енергетска дејност, и тоа со лица кои имаат искуство, со долгогодишен континуитет во работата кај сите досегашни носители на лиценца за регулирано производство на топлинска енергија. РКЕ исто така препорачува ЕСМ ПРОДАЖБА покрај извршители од техничката струка да вработи и извршители од другите нетехнички струки со искуство во извршувањето на дејноста, заради нејзината специфичност и уникатност.

На денешната седница РКЕ ќе ги разгледа и лиценцата за дистрибуција, со која се утврдува дека ЕСМ ДИСТРИБУЦИЈА НА ТОПЛИНА ДООЕЛ Скопје ќе ја извршува енергетската дејност дистрибуција на топлинска енергија со намален број на извршители во однос на просечниот број, па РКЕ повторно препорачува да го зголеми бројот на извршители и тоа со лица кои имаат искуство во извршувањето на дејноста.

Третата одлука која РКЕ ќе ја разгледува е за снабдување со топлинска енергија, која ќе ја добие ЕСМ СНАБДУВАЊЕ СО ТОПЛИНА ДООЕЛ Скопје. Како и при претходните две лиценци, Регулаторна препорачува компанијата да го зголеми бројот на извршители со лица кои имаат искуство во дејноста, како и извршители од другите нетехнички струки со искуство во извршувањето на дејноста, заради нејзината специфичност и уникатност.

П.О.