ЕУ ги заострува критериумите за увоз на храна од трети земји

Добивај вести на Viber

Европската Унија(ЕУ) ги заострува критериумите за увоз на храна. 

Европската комисија планира значително да го поедностави законот за заштита на растенијата, но во исто време да ги заостри критериумите кога станува збор за увоз на земјоделски производи од трети земји, пренесува Политика. 

Според протечениот нацрт на новите прописи, кој го пренесе специјализираниот германски земјоделски портал „Агрархојте“, ЕК очигледно сака да избегне уште еден пораз пред Европскиот суд на правдата (ЕСП) во врска со одобрувањето на „глифосатот“, бидејќи тој суд минатата недела побара повторно да се разгледа одлуката за продолжување на лиценцата за овој препарат.

Исто така, се нагласува дека намерата на Брисел е да го реши проблемот со ненадејниот пад на достапните активни состојки (препарати) на пазарот. Порталот потсетува дека земјоделците се жалеле на овој недостиг во неколку наврати во последните години, бидејќи во пракса честопати немаат соодветни средства за контрола на штетниците.

Се разгледува поедноставување на процедурите за поднесување барања за одобрување на хемиски и биолошки супстанции, а истото би можело да важи и за прехранбените адитиви.

Порталот забележува дека европскиот комесар за здравство, Оливер Вархеји, неодамна објави индикации за олеснување на законот за одобрување во извештајот за напредокот. Покрај сето погоре наведено, новата регулатива носи значително заострување на правилата за увоз на земјоделски производи. Целта е да се спречи можноста забранетите средства да се вратат на пазарот на ЕУ преку стоки од трети земји, што засега се толкува како да не можат да бидат присутни дури ни во траги во увезената стока.

Според некои извештаи, комисијата би можела да го претстави својот план веќе кон средината на декември, додека некои аналитичари веруваат дека тоа нема да се случи пред јануари следната година.

Покрај „глифосатот“, Европскиот суд на правдата (ЕСП) пресуди дека ЕУ мора повторно да го испита обновувањето на одобренијата за некои други супстанции, со образложение дека продолжувањето на лиценците за производи за заштита на растенијата мора да биде исклучок, а не правило. Патем, медиумите потсетуваат дека три еколошки организации ја покренаа оваа постапка пред судот.

За да се намали неизвесноста за компаниите и земјоделците во врска со одобрувањето на производи за заштита на растенијата на минимум, Европската комисија има намера да одобри дозволи за нови активни супстанции во хемиската заштита на растенијата да важат „на неодредено време“. Предуслов е да не станува збор за активни супстанции со висок ризик.

Во вакви случаи, можно е да се обезбедат пократки периоди од пет години - пишува „Агрархојте“ и додава дека ЕК дополнително има намера да ја направи самата постапка за одобрување поефикасна, а од земјите-членки веројатно ќе биде побарано да издвојат ресурси за евалуација на нови активни супстанции со цел да се обезбеди дека постапките за одобрување ќе се одвиваат непречено во иднина.

Покрај активните супстанции со висок ризик, „кандидатите за замена“ исто така нема да добијат трајно одобрување. Како што е објаснето, станува збор за активни супстанции за кои во догледна иднина ќе биде достапна побезбедна алтернатива. Според сегашното законодавство, активните супстанции се одобруваат за ограничен период од 10 до 15 години, а потоа, како во случајот со „глифосатот“, дозволите мора да се обноват. Брисел сега има намера да ги поедностави критериумите за идентификување на активни супстанции со низок ризик. Ќе биде можно ретроактивно да се аплицира за одобрување, што значи дека тие ќе можат побрзо да се најдат на пазарот, со што ќе се намали бирократијата што е дополнителен товар за земјоделците.

Според прелиминарниот нацрт на регулативата, Европската комисија сака да ја зголеми достапноста на одржливи производи за заштита на растенијата, особено оние што содржат биолошки активни супстанции како што се микроорганизми, феромони или растителни екстракти. Земјите-членки, исто така, ќе можат да издаваат привремени одобренија за нови биолошки производи за заштита на растенијата под одредени околности.

foto freepik.com/jcomp