ЕУ се подготвува за дополнително заострување на визниот режим за Русите

Добивај вести на Viber

ЕУ се подготвува дополнително да го заостри издавањето визи за руските граѓани, што во повеќето случаи значи прекин на издавањето на повеќекратни Шенген дозволи, изјавија тројца европски претставници за бриселско „Политико“.

Тоа е уште еден чекор во напорите на ЕУ да ја казни Москва за војната во Украина, што всушност значи дека Русите генерално ќе добиваат визи само за еден влез во Унијата.

Исклучок ќе бидат визите од хуманитарни причини или за оние кои имаат и државјанство на ЕУ.

Брисел веќе го отежна тоа и ги зголеми трошоците за издавање визи за Русите откако го суспендираше договорот за олеснување на визниот режим со Москва на крајот на 2022 година, по агресијата на Русија врз Украина.

Некои членки на ЕУ, како што се балтичките земји, отидоа подалеку со тоа што им забранија или строго го ограничија влезот на Русите на нивните територии.

Сепак, како што потсетува „Политико“, издавањето визи останува под национална надлежност, што значи дека Европската комисија може да го отежни процесот, но не и да воведе целосна, сеопфатна забрана за руски посетители.

Според податоците на Комисијата, повеќе од половина милион Руси добиле Шенген визи во 2024 година, повеќе отколку во 2023 година, но далеку помалку отколку пред војната во Украина - во 2019 година биле издадени повеќе од четири милиони.

Според извештаите, Унгарија, Франција, Шпанија и Италија продолжуваат либерално да издаваат визи на руски граѓани.

Се очекува новите, построги правила за визи, како дел од пакетот мерки за намалување на бројот на Руси што влегуваат во ЕУ, официјално да бидат усвоени и имплементирани оваа недела.

Одделно, како дел од 19-тиот пакет санкции против Русија, ЕУ планира да го ограничи движењето на руските дипломати со тоа што ќе бара од нив однапред да ги известат земјите ако патуваат низ Шенген зоната.

Комисијата, исто така, се подготвува да објави нова стратегија за визи на ниво на цела ЕУ следниот месец со заеднички препораки, вклучително и охрабрување на членовите подобро да ги користат своите визни политики против непријателските земји и примена на построги критериуми за Русите и другите државјани.

Фото: Freepik