Еве кои се државните институции најголеми трошаџии на буџетот: Трошат на плати и на долгови најмногу

Добивај вести на Viber

Министерството за финансии потрошило за четири месеци безмалку 290 милиони евра само преку разделот функции на државата. Оваа сума е над 45 отсто од вкупниот буџет на министерството за цела година. Со најголем дел од овие пари платена е главнина на долговите и каматите за нив. Министерството за труд и социјална политика од јануари до април потрошило една третина од вкупниот годишен буџет или 231 милион евра. Од нив, две третини се за тековни трансфери кон фондовите, а за социјални бенефиции од Министерството „отишле“ 41,3 милиони евра. Овие две министерства традиционално и имаат најголеми буџети односно најголеми буџетски расходи меѓу буџетските корисници.

Статистиката на Министерството за финансии покажува дека Министерството за образование и наука за четири месеци потрошило 115 милиони евра што е 28 проценти од сите планирани расходи за годинава на оваа институција. Најголем дел од парите се префрлени кон Единиците на локална самоуправа (ЕЛС), а втора најзначајна ставка се платите и надоместоците. Трет „трошаџија“ е Агенцијата за фиансиска поддршка во земјоделството со реализирани средства во износ од 64,2 милиони евра. Тоа се пари во најголем дел за субвенции и за трансфери.

Во првите четири месеци годинава од страна на Министерството за внатрешни работи реализирани се вкупно 55,6 милиони евра што претставува 33 отсто од нивниот  буџет за 2018 година. Најзначајна расходна ставка претставуваат платите и надоместоци со учество од дури 70 отсто за што се потрошени 39 милиони евра. Втора најзначајна ставка се стоки и услуги.Министерство за здравство во првите четири месеци од 2018 година потрошило 28,7 милиони евра, најмногу на трансфери.

Во Министерство за одбрана кое во периодот јануари - април 2018 година изврши буџетски средства во износ од 28 милиони евра, најзначаен дел од парите се „отидени“ за плати.  За таа намена се потрошени 71,отсто од сите реализираните пари.

За Финансирање на дејностите од областа на културата во првите четири месеци биле потрошени 16 милиони евра. Платите и надоместоците имаат највисоко учество во вкупните расходи со 34,4 проценти, а само за ова се потрошени 5,5 милиони евра.

Министерство за транспорт и врски во првите четири месеци од 2018 година реализираше средства во износ од 11,6 милиони евра. Капиталните расходи имаат највисоко учество во вкупните расходи на таа институција со речиси 60 отсто. За таа намена потрошени се  само 6,9 милиони евра.

А.Т.