Еврогрупата со позитивни ставови пред состанокот за Грција

Добивај вести на Viber

Шефот на Меѓународниот монетарен фонд Кристин Лагард, изјави дека ќе работи конструктивно со министрите за финансии од еврозоната, кои денеска имаат состанок во Брисел за помошта за Грција. - Тука сме за да работиме многу конструктивно и да видиме дали може да се најде решение за Грција. Тоа е нашата висинска цел, нашата намера и нашата мисија, изјави Лагард пред состанокот. Лагард нагласи дека долгот на Грција мора да биде одржлив. - Имаме добри шанси да дојдеме до убедливо заедничко решение, но не можам сосема да бидам сигурен, изјави претседателот на еврогрупата Жан Клод Јункер пред да почне да претседава со состанокот. Според него, „јасно е дека Грција го испорача тоа што беше побарано од неа“. Еврокомесарот за економски и монетарни прашања Оли Рен повтори дека „Грција покажала оти е сериозна во врска со фискалните мерки и реформи“. Рен рече дека разговорите со ММФ биле „конструктивни“ и изрази увереност дека вечерва ќе биде постигнат договор. Германскиот министер за финансии Волфганг Шојбле изрази надеж дека разликите со ММФ би можеле да бидат надминати, со што уште вечерва би можел да биде постигнат договор. Од друга страна, ирскиот министер за финансии Мајкл Нунан изјави дека не е сигурно оти министрите за финансии од еврозоната ќе постигнат договор за Грција на вечерашниот состанок во Брисел. Грчкиот министер за финансии Јанис Стурнарас на средбата влезе без коментар за медиумите.