„Фајненшел тајмс“: Хрватска е новата Грција – најлоша економија во ЕУ!

Добивај вести на Viber

Хрватска ја наследи Грција на неславното место на најнефункционална економија во Европската унија, објави „Фајненшел тајмс“. За ова придонела општата слабост на европската економија, но и инертноста на хрватската Влада во спроведувањето на реформите, а за да се извлече од оваа ситуација на земјата ќе и биде неопходно ефикасно повлекување на средства од фондовите на ЕУ, проценува угледниот весник. „Бавното и болно заздравување на грчката економија по катастрофалната должничка криза поттикна едно интересно прашање: која земја сега ја зема титулата на најнефункционална во Европската унија? Одговорот секако е Хрватска. Тоа е мала земја, која дури минатата година влезе во ЕУ и не е во еврозоната. На нејзините прекрасни острови и плажи животот се чини удобен, па затоа Хрватска и нејзините економски проблеми остануваат ’надвор од досегот на радарот’“, се наведува во текстот. Притоа се потсетува дека Хрватска веќе шеста година по ред е во рецесија и оти за тоа време загуби речиси 13% од својот БДП. Невработеноста во земјата изнесува околу 17%, а кај младите дури над 50%. „Тоа е социјална катастрофа која не се разликува многу од она што во последните пет години се случуваше во Грција и Шпанија. Хрватска, како и Грција, има неефикасен јавен сектор, кој задржува луѓе на работни места кои очигледно не служат на јавниот интерес и всушност само го прикриваат вистинското ниво на невработеност. Овој проблем уште повеќе се зголемува заради недостигот на компании во приватниот сектор кои можат да создаваат работни места и успешно да се натпреваруваат на европските пазари“, додава „Фајненшел тајмс“.