ФАЈЗЕР ТАБЛЕТАТА ГО НАМАЛУВА РИЗИКОТ ОД СМРТ ЗА 89 ПРОЦЕНТИ: Компанијата ќе бара одобрување од медицинските регулатори

Добивај вести на Viber

Американската фармацевтска компанија Фајзер денеска објави дека нејзината експериментална антивирусна таблета за лекување на Ковид-19 ја намалува стапката на хоспитализација и смртност за речиси 90 отсто.

Од Фајзер велат дека ќе побараат од американската Администрација за храна и лекови (ФДА) и меѓународните регулатори да ја одобрат таблетата што е можно поскоро, откако независните експерти препорачаа студијата да се прекине порано врз основа на силата на нејзините резултати.

Откако компанијата ќе пријави, односно ќе побара одобрување, ФДА може да донесе одлука во рок од неколку недели или месеци. Студијата била спроведена на 775 возрасни лица, при што е заклучено дека пациентите кои го земале лекот Фајзер заедно со друг антивирусен лек имале 89 отсто намалување на хоспитализацијата или стапката на смртност по еден месец, во споредба со пациентите кои земале пласебо.

„Се надевавме дека ќе имаме нешто извонредно, но ретко може да се видат одлични лекови со речиси 90 проценти ефикасност и 100 проценти заштита од смрт“, изјави д-р Мајкл Долстен, главен научник на Фајзер.

Учесниците во студијата биле невакцинирани, со благ до умерен ковид-19 и се проценува дека се изложени на висок ризик за хоспитализација поради здравствени проблеми како што се дебелина, дијабетес или срцеви заболувања.

Третманот започнал во рок од три до пет дена од првите симптоми и траел пет дена.

ФОТО: YouTube Print screen