ФАКТОР НА ДЕНОТ: Црна сабота во Македонија, изгубивме уште 45 сограѓани

Добивај вести на Viber

ДЕНЕС ИМА 45 ПОЧИНАТИ ОД КОРОНАВИРУСОТ

Министерството за здравство информира, согласно податоците од Институтот за јавно здравје:

Во последните 24 часа се направени 4.920 тестирања, а регистрирани се 1.394 нови случаи на КОВИД-19 во:

Скопје – 592, Куманово - 104, Битола – 101 ,Прилеп – 63,Велес – 60, Кавадарци – 50, Охрид – 39, Тетово -38, Штип – 37, Гостивар – 35, Струмица – 31, Кичево – 30, Кочани – 24, Неготино – 21, Свети Николе и Ресен – по 19, Гевгелија – 18, Струга – 17, Радовиш и Берово – по 14, Делчево и Виница – по 11, Крива Паланка - 10 ,Валандово – 8, Богданци - 6, Демир Капија – 5, Македонски Брод – 4, Дебар – 3, Пробиштип,Кратово и Пехчево – по 2, Крушево, Демир Хисар,Македонска Каменица и Дојран – по 1.

Регистрирани се 479 оздравени пациенти од:

Скопје – 245, Прилеп – 35, Кавадарци – 27, Куманово и Велес – по 21, Битола и Свети Николе – по 15,Гостивар,Струмица и Гевгелија – по 12, Кочани – 11, Неготино -10, Тетово – 9, Берово,Валандово и Богданци – по 6, Пробиштип – 4, Кичево – 3 , Македонски Брод – 2, Штип,Ресен,Радовиш, Виница, Крушево,Кратово и Пехчево – по 1 .

ОПОЗИЦИЈАТА БАРА ОСТАВКА ОД ФИЛИПЧЕ

Да го измиеме срамот – кога во Македонија умираат по 50 луѓе на ден Заев и Филипче летаат со хеликоптер, порача денеска на протестот пред Министерството за здравство, претседателот на Градскиот комитет Скопје на ВМРО-ДПМНЕ, Владимир Нелоски. 

Тој фрли балон полн вода кон Министерството за здравство. 

ФИЛИПЧЕ БАРА ВМРО-ДПМНЕ ДА НЕ ШИРИ ЛАГИ

Министерството за здравство гo повикува ВМРО-ДПМНЕ да не шири невистини дека во болниците нема кислород и со тоа да ги одвраќа граѓаните да добијат бесплатен и квалитетен здравствен третман во јавно здравствените установи и да ги наведува да се задолжуваат, и да се лекуваат во приватни болници. 

„ВМРО - ДПМНЕ како најголема опозициска партија има на располагање ефикасен и конструктивен демократски механизам, а тоа е да ја употреби својата позиција да иницира легални решенија во рамки на законодавниот дом кои ќе бидат во насока на подобрување, на квалитетот на животот и благосостојбата на граѓаните. ВМРО ДПМНЕ не само што не го искористува овој механизам, туку покажа пракса на блокирање на антикризните мерки кои резултираа со доцнење на помош и друга финансиска помош на најпогодените во ковид пандемијата, исто како кога ВМРО ДПМНЕ го блокираше и процесот на изградба на модуларни инфективни одделенија за третман на ковид пациенти“, реагираат од  Министерството за здравство. 

НА ПОТЕГ Е КОСОВО ДА ГО ЕКСТРАДИРА ИСМАИЛОВИЌ

Од Министерството за внатрешни работи за ТВ21 велат дека одреден е притвор за Африм Исмаиловиќ и се очекува лицето да биде екстрадирано во Македонија.

Македонија очекува Косово да го екстрадира Африм Исмаиловиќ, осуден на доживотен затвор за случајот „Монструм“, а кој завчера беше приведен во Приштина. Премиерот Зоран Заев денеска во Велес изјави дека тоа ќе биде потврда на меѓународни договори.

ИДНАТА РАБОТА НЕДЕЛА ПРОДОЛЖУВА КОМУНИКАЦИЈАТА СО БУГАРИЈА

Од понеделник започнуваме нова динамика на комуникација со Бугарија, вели шефот на македонската дипломатија, Бујар Османи. 

Тој е оптимист. Османи изјави дека поминал неколку изборни процеси и затоа знае дека изборите секогаш ги „киднапираат“ редовните политички процеси и ги подигнуваат емоциите на високо ниво. 

„Мислам дека најдобрата стратегија е да започнеме со прашањата кои не зближуваат, кои креираат доверба за да потоа во еден амбиент на меѓусебна доверба ги третираме и прашањата за кои имаме разлика. Затоа имајќи ја во предвид улогата на изборите кои обично ги имаат ваквите сензитивни и емотивни процеси убеден сум дека од понеделник влегуваме во нова динамика на комуникација каде што фокусот ќе биде во рационалноста, а не во емоциите“, изјави Османи.