ФАКТОР НА ДЕНОТ: Филипче најави смена на Зибери, а денес нови 153 заразени

Добивај вести на Viber

ФИЛИПЧЕ И ЗИБЕРИ ВЛЕГОА ВО КАВГА

Во ниеден момент не донесовме политички мотивирани одлуки и ова вие добро го знаете, му одговори на Фејсбук, министерот за здравство, Венко Филипче на директорот за јавно здравје, Арбен Зибери. 

Филипче вели дека ако сме во изборна кампања, не значи дека е дозволено да изнесува невистини. 

„Вашата изјава е неточна, штетна и пред сѐ неколегијална, што исклучително ме загрижува. Моја должност како министер меѓу другото е да го штитам угледот на колегите од комисијата и нивните стручни одлуки. Верувам дека разбирате каква штета нанесувате во овие чувствителни моменти кога заеднички се бориме за иста цел. Го ценам придонесот на сите кои се борат со епидемијата, вклучително и вашиот, но нема да дозволам политичко поентирање на сметка на епидемијата“, пишува Филипче. 

ДЕНЕС ИМА 153 ЗАРАЗЕНИ И 6 ПОЧИНАТИ

Во последните 24 часа се направени 1.279 тестирања, а регистрирани се 153 нови случаи на ковид-19. Починати се 6 лица, еден пациент од Скопје, двајца од Штип, еден од Тетово, еден пациент од Охрид и еден од Ресен. Повторно, исто како и вчера не се соопштени годините на починатите, ниту во која болница биле хоспитализирани.

Од новозаболените најмногу се во Скопје или 66, додека од Куманово се 13, а од Тетово - 20. Во Штип 13, Прилеп 2, Струга 7, Битола 1, Охрид 7, Крива Паланка 1, Кочани 1, Пробиштип 1, Свети Николе 3, Кичево 6, Ресен 12.

Денеска Институтот за јавно здравје регистрира 75 оздравени пациенти.

БОКИ 13 ПОДНЕСЕ КРИВИЧНИ ПРИЈАВИ

Адвокатот Сашо Дукоски тврди дека денеска пред давањето исказ во Јавно обвинителство имало закани кон Бојан Јовановски од неговиот телефон. Тој денеска не успеал да ги поднесе сите планирани кривични пријави, но записникот останал отворен, па поднесувањето ќе продолжи на 3 јули.

Повеќе десетици имиња се на листата кривични пријави кои денеска во скопското обвинителството ги предаде Боки 13. Меѓу нив има функционери и бизнисмени за злоупотреби и други тешки кривични дела. 

Од ВМРО-ДПМНЕ прашуваат кој се плаши од исказот на Боки 13 и неговата содржина, за преку телефон, додека истиот е на суд со неговиот адвокат, да ѕвони од непознат број и со мутиран глас да се закани на адвокатот. 

За случајот „Рекет“, Јовановски доби казна затвор од 9 години. 

Во текот на утрешниот ден, Државниот санитарен и здравствен иснпекторат, ќе ги објави имињата на 138 лица кај кои не е извршена уредна достава на решенијата.

-Во согласност со Законот за општа управна постапка, член 84, ДСЗИ отпочна со јавна објава на лицата кај кои во изминатиот период не е извршена уредна достава на решенијата, потврди за Фактор директорката на Државниот санитарен и здравствен инспекторат, Ирина Бухова.

ЧИТАЈТЕ УШТЕ

Хигиена, дистанца и задолжителна маска, сите патници кои ќе полетуваат и ќе слетуваат на двата македонски аеродроми од први јули од кога почнува редовниот сообраќај ќе мора да почитуваат нови правила на однесување.

Државната компанија Електрани на Северна Македонија (ЕСМ) им исплатила на вработените регрес за годишен одмор за 2020 година во вкупна вредност од 166 милиони денари или над 2,6 милиони евра во текот на овој месец.

Поради пандемијата на коронавирусот, луѓето се свртени кон себеси и повеќе внимаваат на здравата исхрана и здравите навики за да имаат подобар имунитет.