Фатмир Битиќи: Физибилити студија и за Македонски железници - Транспорт и ТЕЦ Осломеј

Добивај вести на Viber

Вицепремиерот за економски прашања Фатмир Битиќи на дебата на тема „Работењето на државните претпријатија низ призмата на финансиските индикатори“ најави Физбилити студии и за Македонски железници - Транспорт и за термоелектраната ТЕЦ Осломеј. Според вицепремиерот, студиите треба да утврдат дали има потреба да се дадат на управување на приватен оператор и на кој начин тоа да се изведе.

„Нашите анализи покажаа дека преструктуирањето на некои од претпријатијата е неминовен процес кој што ќе се одвива во наредниот период, впрочем истите се во корелација со податоците од оваа анализа. Веќе знаете дека Владата има започнато процес на избор на компании за физибилити  студија за Македонски пошти и ТЕЦ Неготино и истиот процес ќе следи и за Железници на Северна Македонија Транспорт, ТЕЦ Осломеј или дел од енергетските капацитети кои функционираат во рамките на АД Електрани на Северна Македонија. Според податоците од физибилити студијата ќе се утврди моделот кој е најсоодветен за преструктуирање на овие претпријатија, дали тоа ќе биде јавно приватно партнерство или пак можеби приватизација на истите“, рече Битиќи.

Тој додаде дека ако направените студиите покажат дека некое од претпријатијата можат да бидат самоодржливи со сегашниот статус, тогаш ќе бидат направени планови за внатрешни промени кои ќе им овозможат да го подобрат нивното работење или да работат со позитивен финансиски резултат.

За  време на дебатата истакнато беше дека е важно да се обезбеди квалитетно управување со јавните претпријатија во државна сопственост или во сопственост на општините. Во моментот во државата функционираат вкупно 145 јавни претпријатија во државна сопственост или во сопственост на локалната самоуправа, со вкупен приход од околу 810 милиони евра, а во кои работат околу 29 илјади лица.