ФОКУС НА ДЕНОТ: Колегите се оградуваат од Катица Јанева, кој ќе ја замени?
Објавено во: Македонија 23 Август, 2019
Oбвинителката од СЈО, Лиле Стефанова денеска се огради од специјалната јавна обвинителка, Катица Јанева која доби 30 дена притвор како осомничена во случајот „Рекет“.
Вели дека од самиот старт била воздржана кон работата на Јанева и дека според неа, во моментов не е важно дали осомничениот е шеф или колега.
„Денеска гледаме расчистување со криминалот и треба да бидеме горди на тоа“ – вели Стефанова.
Таа додаде дека никогаш не се ни доближила до Јанева.
Претходно и обвинителката Фатиме Фетаи се огради од Јанева, и потенцираше дека секој кој се огрешил мора да одговара.
Oбвинителката Лиле Стефанова по судењето на „Титаник“, одговарајќи на новинарско прашање дали таа ќе ја замени специјалната јавна обвинителка Катица Јанева.која заврши во притвор за „Рекет“, кажа дека ниту претендира, ниту ќе конкурира за замена на Јанева.
„Истагата за „Империја“ застана по донесување на начелното правно мислење и ќе повторам, нема друг решение, освен час поскоро да се донесе законот за Јавно обвинителство. Политичарите мора, во овој момент да си ја преземат одговорноста“, изјави Стефанова.
Стефанова, ситуацијата во СЈО ја опиша како најтешка до сега.
Законот за Јавно обвинителство, со кој треба да се реши статусот на Специјалното јавно обвинителство, следната недела оди во Собрание каде е закажана седница за вторник, иако засега се уште нема договор меѓу работните групи на власта и опозицијата.
Собраниската седница за предлог-законот е закажана за 27 август, по враќањето на пратениците од колективниот одмор. За законот е потребно двотретинско мнозинство, односно поддршка од 80 пратеници.
Од Министерството за правда за МИА велат дека засега нема закажно нова средба, иако претходно беше најавено дека разговорите ќе продолжат неделава. Сметаат дека компромисот треба да се гради во Собранието.
– Најдобра опција е консензусот да се прави во Собрание. Пратен е текстот и добро е сите пратеници што имаат забелешки да поднесат амандмани, наведуваат од Министерството за правда.