ФОКУС НА ДЕНОТ: Партиите се караат за повратот на ДДВ, „падна“ обвинување за разузнавачки активности

Добивај вести на Viber

Oд ВМРО-ДПМНЕ реагираат на соопштението на СДСМ дека Владата на Зоран Заев со Мој ДДВ ќе им ги врати парите на граѓаните. 

Наведуваат дека граѓаните со оваа мерка може да добијат во просек 156 денари во месецот, односно 1872 денари годишно, што значи  никогаш нема да стигнат до бројката од 30.000 денари која Зоран Заев им ја ветуваше. За да се оствари ветувањето на Заев дека граѓаните ќе добијат 30.0000 денари од поврат на ДДВ и ќе можат да реновираат соба, да исплатат кредит или да одат на одмор потребни ќе бидат дури 16  години, а не една година, реагираат од партијата. 

„Зборот за СДСМ не важи, туку лажи. Откако се СДСМ на власт парите наместо кај граѓаните завршуваат кај кланот Заеви и бизнисите на функционерите во врхушката на власт. СДСМ за две години ги осиромаши граѓаните на Република Македонија, а државата ја доведе до економски колапс. Заради погрешните економски политики на власта над 500.000 граѓани живеат под прагот на сиромаштијата, јавниот долг ја надмина психолошката граница од 50% од БДП, а македонската економија е на дното во Европа. Додека повеќе од 70% граѓани земаат плата помала од просечната и не знаат како ќе го преживеат месецот, власта ги замајува со мерки од кои единствено корист ќе имаат најбогатите“, велат од ВМРО-ДПМНЕ. 

Додаваат дека доколку СДСМ навистина сака да им помогне на граѓаните треба да ги намали даноците, да ја укине акцизата, да стимулира намалување на цените на мало и да престане да ги ограбува преку наместени, тендери, грантови и непотистички вработувања.

Арамиите од белиот дворец, од ВМРО-ДПМНЕ, упорно се противат на повратот на пари кај граѓаните, реагираат од СДСМ на опозициското соопштение во кое беше наведено дека со повратот на ДДВ граѓаните никогаш нема да можат да вратат 500 евра, како што најавуваше премиерот Зоран Заев. 

Од СДСМ велат дека ВМРО-ДПМНЕ е против мерката за враќање на 15% од ДДВ назад кај граѓаните, против тоа 50 милиони евра годишно да завршат кај народот.

„ВМРО-ДПМНЕ е против ефтината тарифа на струјата, против тоа 11 милиони евра годишо да завршат кај граѓаните. ВМРО-ДПМНЕ е против зголемена социјална помош од 300%. ВМРО-ДПМНЕ е против можноста за поврат на персонален данок за земјоделците, против тоа 200 милиони денари да се вратат кај земјоделците. ВМРО-ДПМНЕ е против намалувањето на ДДВ за парното од 18 на 5%. ВМРО-ДПМНЕ е против зголемувањето на минималната плата, против тоа 90 илјади работници да земаат поголема плата. Арамиите од ВМРО-ДПМНЕ се против секоја мерка која носи пари кај граѓаните, во секое семејство. Тоа е ВМРО-ДПМНЕ“, стои во соопштението. 

Во Северна Македонија има разузнавачи кои сакаат да ѝ наштетат на Србија, тврди претседателот на собраниската комисија за Косово во српскиот Парламент, Милован Дрецун. 

Вели дека пред два месеци е формиран силен разузнавачки тим, кој работи скриен во голема западноевропска фабрика за автомобили во Скопје, а чиешто тајно делување било насочено кон блокада на постигнувањето на компромисно решение помеѓу Белград и Приштина. Според неговите зборови, тоа го прават разузнавачи од Бугарија, Албанија, Северна Македонија и Германија.