ФОТО: Кои беа најсилните земјотреси во 2016 година?
Објавено во: Свет 25 Август, 2016
Природните катастрофи често не можат да бидат предвидени. Во 2016 година неколку земјотреси ја потресоа земјата при што имаше илјадници жртви.
На 24 август 2016 година, Италија беше потресена од силен земјотрес со интензитет од 6,2 степени по Рихтер. Епицентарот е регистриран во близина на градот Норча. Жртвите се стотици, а над 200 лица се водат за исчезнати. Ова не е прв катастрофален земјотрес за оваа година. Скоро секој месец во различни делови на светот имаше потреси, кои уништија домови и однесоа жртви.
Во месец август имаше уште еден силен земјотрес. Во јужниот дел на Перу на 16 август земјотрес со интензитет од 5,2 уби 9 лица и рани над 52. Четири месеци порано на 17 април земјотрес со интензитет од 7,8 степени по Рихтер во Еквадор зеде над 602 животи, рани над 12 500 луѓе.
Неколку дена пред земјотресот во Еквадор во префектурата Кумамото, Јапонија, потрес со интензитет од 6,4 степени однесе 9 жртви и повреди над 900 луѓе на 14 април.
Во месец февруари земјотрес со интензитет од 5,2 степени ја погоди Грција.
Во Тајван на 5 февруари во земјотрес од 6,4 степени по Рихтер, имаше 14 жртви и над 500 повредени. Истиот ден земјотрес со интензитет од 5,5 степени се случи во Непал, при што најмалку 25 лица беа повредени.
Уште во првиот месец од годината исто така, имаше два тешки земјотреси.
Едниот беше регистриран на 25 јануари крај бреговите на Шпанија со интензитет од 6,2 степени. Другиот силен земјотрес беше на 4 јануари во Индија - со интензитет од 6,7 степени.