Француската влада се закани со национализација на фабриката на АрчелорМитал

Добивај вести на Viber

Француската влада може привремено да ја преземе фабриката на АрчелорМитал во Флоранж, бидејќи компанијата одбива да го продаде целосно,  соопшти министерот за индустрија Арно Монтебур. Според него, АрчелорМитал не ги исполнила обврските кога ја купи фабриката во 2006 година. „Ние веќе не го сакаме Митал во Франција, бидејќи компанијата не ја почитува државата“, коментира францускиот министер. Фабриката на компанијата во североисточна Франција не работи со месеци, а во почетокот на октомври, беше јасно двете печки ќе бидат изгасени и производството запрено. Истовремено Владата на Франсоа Оланд нареди или АрчелорМитал да ги рестартира печките, или да ја продаде фабриката во Флоранж за која Монтебур тврди дека има интерес од потенцијални инвеститори. За францускиот министер за индустрија, битката за Флоранж е од примарна важност, откако не успеа да го запре затворањето на една од фабриките на Peugeot, пишува Фајненшл Тајмс. Во меѓувреме, Лакшми Митал предупреди дека ако заканата на Монтебур се оствари и фабриката во Флоранж биде национализирана, под закана за отказ ќе бидат над 20 илјади луѓе, вработени во претпријатија на АрчелорМитал во цела Франција.  Според претставници на металуршката индустрија битката меѓу Митал и Монтебур добива загрижувачки димензии. Според Николас Спиро, консултант од Лондон, француската влада го користи Арно Монтебур , за да ги замолкне синдикатите. Аналитичарите се обединуваат околу мислењето дека владата се вклопи во идејата за зачувување на работните места и веројатно тие се оние кои треба да ја одржуваат профитабилноста на ваквите  претпријатија, за да се овозможи долгорочен развој на индустријата по кризата. Правниците коментираат дека од чисто правна гледна точка, заканата на Монтебур да го национализира претпријатието е неостварлива.