ГАЗДАТА ЈА ИЗБРКАЛ БИДЕЈЌИ БИЛА БРЕМЕНА И НЕ ДОАЃАЛА НА РАБОТА - добиена првата пресуда за кршење на работничките права за време на ковид
Објавено во: Економија 23 Декември, 2020
Работничка од приватен сектор во Куманово ја доби првата кривична пресуда за кршење на работнички права за време на корона-кризата, соопшти Кристина Ампева од Гласен Текстилец. Таа нагласи дека за време на оваа здравствено - економска криза, каде што многу работници останаа без работа, со незаконски откази, утринава ја добила позитивната вест.
„Гласен Текстилец го следеше судскиот случај, на една работничка од Куманово, којашто беше бремена и ги користеше времените мерки донесени од Владата, со коишто бремените беа ослободени од работа. Работодавачот и даде незаконски отказ, поради кршење на ред и дисциплина. Оваа работничка собра храброст и го тужеше работодавачот, со тужба поради работен спор и приватна кривична тужба и ја доби оваа битка, со што судот го усвои тужбеното барање, го утврди незаконитото постапување, со кои се повредени работничките права. Судот го поништи решението за откажување на договорот за вработување, како незаконито“, вели Ампева.
Според неа, работничката одобрила да се објави информацијата, со цел да се охрабрат работниците, доколку се повредени нивните работнички права и да бидат одлучни и упорни во нивното остварување.
„Да се обратите до соодветните институции, како и до Гласен текстилец, кој секогаш е на страната на работниците и секогаш достапен да даде помош и соодветно да ве упати при остварувањето на работничките права. Правдата е достижна, само е потребно храброст, одлучност и упорност“, порача Ампевa.
извор: работник.com.mk