Германија очекува до 800 000 имигранти во 2015 година

Добивај вести на Viber

Германскиот министер за внатрешни работи Томас де Мезиер изјавил дека Германија очекува оваа година до 800 000 имигранти, што е апсолутен рекорд, пренесе „АФП“.

Де Мезиер ја повика Европската комисија да преземе мерки против земјите членки, кои не ги почитуваат обврските за прием на мигранти.

Тој изјавил дека очекуваните 800 000 мигранти се вистински предизвик за Германија. Претходните прогнози беа за 500 000 луѓе. „Ова е вистински предизвик што ќе го надминеме“, изјавил министерот.

188 000 мигранти пристигнаа во ЕУ преку море оваа година.

Германија е принудена да ги сместува мигрантите во шатори, контејнери или касарни. Де Мезиер предупреди дека во подолг рок Германија нема да може сама да презема околу 40% од мигрантите и бегалците во Европа, како што е случај сега.

Министерот за внатрешни работи изјавил дека за Европа е неприфатлив и срамен огромниот број мигранти од балкански земји како Албанија, Косово или Србија, чија молба за азил нема шанси да биде одобрена. „Тие ќе мора да ја напуштат нашата земја“, истакнал Де Мезиер.

Германија е една од најбараните европски земја за имигрантите. Во првите седум месеци од годинава таа регистрирала 218 221 барања за азил, или над двојно повеќе (124,8% зголемување) за разлика од 2014 година и повеќе отколку за целата мината година, кога тие биле 202 834.

Зголемениот број се должи во голема мера на огромното зголемување на бројот на мигрантите од Косово, Албанија и Србија.

За првите седум месеци од годината се зголеми и бројот на Сиријци кои бараат азил во Германија - 44 417 лица спрема 16 616 за истиот период од 2014 година. Најмногу барања за азил - 438 000 - Германија регистрирала во 1992 година во екот на војната во поранешна Југославија.