Ги бришат ли од евиденција невработените кои одбиваат да ја прифатат понудената работа?

Добивај вести на Viber

Преку Агенцијата за вработување,  невработените во земјава добиваат понуди за работа, но не сите прифаќаат да работат. Тие наведуваат различни причини зошто не им одговара одредено работно место.

Бројките покажуваат дека заклучно со 30 септември годинава, преку центрите за вработување понуда за работа добиле 3.110 лица, од кои 2.433 ја прифатиле понудата, а 538 лица не прифатиле  понуда за  вработување од оправдани или неоправдани причини. За 139 лица центрите за вработување сè уште не добиле информација од работодавачите кај кои биле упатени дали биле избрани и дали прифатиле понуда за вработување.

„Причини за неприфаќање на понудената работа кои невработените лица најчесто ги наведуваат се: здравствени, условите за работа кај работодавачот, ниска плата, обврски околу чување на дете, одалеченост од домот до работата, дека има аплицирано за друго работно место кај друг работодавач и чека одговор  и друго“, велат од Агенцијата за вработување.

Објаснуваат дека лицата не се бришат од евиденцијата на невработени лица веднаш по одбивањето на понудата за вработување.

„Лицето се брише од евиденција на невработени лица во согласност со Законот за вработувањето и осигурување во случај на невработеност, доколку два пати во текот на две години одбие соодветно или погодно вработување или одбие да присуствува или не се јави на интервју за работа на кое е упатено од страна на Агенцијата“, додаваат од Агенцијата за вработување.

Но, многу од невработените претпочитаат сами да бараат работа, и изгубиле надеж дека преку Агенцијата за вработување можат да се вработат.

„Јас не сум во евиденцијата на Агенцијата за вработени. Нудат работа, но тоа е за мали плати. Народот не се нафаќа да работи за минимални плати, туку сам си бара работа“, вели Снежа, граѓанка.

Во јули годинава се регистрирани 117.049 невработени. На веб сајтот на Агенцијата за вработување постојано има објавени огласи за неколку илјади слободни работни места во државата.