Големи кадровски промени во Бирото за јавна безбедност – се поставуваат нови челници во полицијата

Добивај вести на Viber

Нови началници добиваат скопската, тетовската и струмичката полиција. Од Бирото за јавна безбедност (БЈБ) воведуваат нови сектори на стратешко и регионално ниво. Во однос на кадровските промени, со скопската полиција сега ќе раководи Горанчо Савовски како замена на досегашниот началник Апостол Стојановски. Прв човек на полицијата во Струмица станува Ѓорѓи Божинов, на местото на Марјан Наковски. Промени има и во Тетово каде началник станува Фаредун Зенели. Бирото за јавна безбедност пак ќе биде поделено на шест сектори, што ќе ги раководат помошници на директорот на БЈБ, што значи дека тој добива шестмина помошници. Единицата за брзо распоредување добива нов командат, а досегашниот е назначен за раководител на новиот сектор за посебни единици. „Со реорганизација во БЈБ мислиме дека ќе се обезбедат двата принципа кои беа основа за анализата, а тоа се ефективност и поголема економичност во работењето“, информира денеска директорот на БЈБ, Митко Чавков, кој посочи дека нема да има нови вработувања, но исто така нема да има бркања од работа или уназадување. Во Бирото за јавна безбедност , кое има околу 10 илјади вработени, за неколку раководни места на интерен конкурс аплицирале повеќе од 400 кандидати. Во однос на новите сектори, сега ќе има сектори за  полициски работи од општа и посебна надлежност, за сообраќајни работи, за криминалистичка полиција, а криминалистичко разузнавање и анализа, за гранични работи, за заеднички работи и управување со човечки ресурси. Исто така се воведува и посебен регистар за соработка со НАТО и безбедност на класифицирани информации.