Град Скопје ги избра најдобрите ресторани и гостилници за годинава

Добивај вести на Viber

Најдобрите три гостилници за 2013 година се: „Ѓезме кај тумба“, „Капка“ и „Дарија“, а најдобрите три ресторани, „Лира“, „Сушико“ и „Гурмет“. Град Скопје и годинава ја продолжи традицијата и повторно во соработка со Агенцијата „Swot Research“, го реализираше проектот за избор на Најдобар угостителски објект меѓу најдобрите. За реализација на овој проект, Градот Скопје ангажира професионална агенција со експертско знаење и искуство во анализа на квалитет на услуга која по пат на т.н. mystery shopping, односно преку директна посета од на независни и објективни тајни купувачи/гости го истражуваа и оценуваа квалитетот на услугата според однапред утврдени критериуми. Со проектот се опфатени вкупно 100 угостителски објекти на територијата на градот Скопје, од кои 50 ресторани и 50 гостилници, кои со вкупно 300 посети, или секој по три пати, се оценуваат според следниве 8 критериуми: прв контакт со вработените, хигиена на објектот, тоалет, амбиент, услуга на келнерите, општа услуга, квалитет на храната и завршен контакт со вработените. Овој проект се спроведува шеста година по ред, а плакетите за најдобрите три гостилници и најдобрите три ресторани, денеска ги врачи градоначалникот на Град Скопје, Коце Трајановски. Тој ги охрабри угостителите да ја контактираат градската администрација за каква било идеја и сугестија или иновација во угостителската дејност. Целта на овој проект е да се разбуди свеста кај угостителите и кај граѓаните за важноста на квалитетот на услугата спрема клиентите во угостителската дејност, како и да се подигне општото ниво на квалитет во угостителските објекти на територијата на Скопје.