Грчките пратеници гласаат за мерките за штедење

Добивај вести на Viber

Грчките пратеници денеска ќе гласаат за предлог законот за мерките за штедење кој на повеќе од 500 страници содржи легислативи кои се однесуваат на се – од нивото на платите во јавниот сектор до за тоа какви производи може да се продаваат во супермаркетите.

Според законот, возраста за пензионирање се зголемува од 65 на 67 години, пензиите меѓу 1.000 и 1.500 евра се намалуваат за пет отсто, оние меѓу 1.500 и 2.000 евра за 10 отсто, а оние над 2.000 за 15 проценти. Бонусите за Божиќ, Велигден и одмор ќе бидат укинати, а еднократните исплати за луѓето кои се пензионираат ќе бидат намалени до 83 проценти, во зависност од секторот.

За време на преговорите со „тројката“, премиерот Андонис Самарас сакаше да ги сочува таканаречените „специјални плати“ во државната администрација кои им се исплаќаат на воениот персонал, безбедносните служби, судиите и лекарите. Но предлог-законот предвидува намалување и на ваквите приходи од два до околу 30 проценти за овие категории вработени во јавниот сектор.

Судиите се најмногу погодени, затоа што нивните плати се намалени за 30 отсто.

Вработените во јавните претпријатија, познати како ДЕКО, се соочуваат со слични намалувања на платите, затоа што се ставени во платната структура на јавната администрација. Тоа значи дека платите ќе се намалат за 30 до 35 отсто, а максимумот за приходите е одреден на 1.900 евра месечно.

Исто така ќе се намалат и платите на работените во министерствата, во локалната власт, во Националната разузнавачка служба и на претседателот на државата. Јавните службеници повеќе нема да добиваат бонуси за Божиќ, Велигден и за одмор.

Според предлог-законот, на 2.000 државни службеници оваа година ќе им се даде известување за технолошки вишок по што една година ќе примаат 75 отсто од платата, а потоа ќе бидат отпуштени ако за нив не се најде друга позиција.

Уште 6.250 државни службеници ќе бидат отпуштени на ист начин на секои три месеци следната година. Правилото да се вработи еден работник на отпуштени пет, ќе биде на сила до 2016 година.

Во однос на прописите за работните односи, законот и дава право на Владата да ја одреди минималната плата од април следната година, го намалува периодот за отказен рок и го ограничува надоместот за работниците со повеќе од 16 години стаж.

Нацрт-законот, исто така, предвидува либерализација на 14 професии, меѓу кои се адвокатите и инженерите. Законот има за цел да ги отстрани забраните во другите сектори, како што е на пример, да им се дозволи на супермаркетите да продаваат производи од тутун. На сопствениците на продавници исто така им се дава право да побараат од вработените да работат повеќе флексибилни часови, што може да доведе и до работење во недела.