ГРЕКО има забелешки и за работата на СЈО
Објавено во: Македонија 25 Јуни, 2019
Специјалното јавно обвинителство се споменува во извештај на Групата земји за борба против корупцијата (ГРЕКО).
Обвинителите не гонат висока корупција и политички чуствителни случаи, наведуваат експертите на ГРЕКО.
Според нив, системот на кривична правда во Македонија не е успешен во борбата против корупцијата. Ова стои во новиот извештај за Македонија за спречување на корупција и промовирање на интегритет кај централната власт и органите за спроведување на законот.
Наведуваат дека иако Специјалното јавно обвинителство оформи предмети во суд за неколку случаи на корупција на високо ниво кои произлегуваа од скандалот со прислушување, обвинителите генерално не гонат систематски случаи од висок профил или политички чувствителни случаи.
Се смета дека напредокот ќе зависи од тоа дали судството може да почне да функционира независно и непристрасно.
Министерството за правда го објави Извештајот на ГРЕКО за Евалуација на Република Северна Македонија за „Спречување на корупција и промовирање на интегритет кај централната власт и органите за спроведување на законот“.Ако погледнеме во поширок контекст, до крајот на 2018 година, Србија нема целосно исполнето ниту една од 17-те препораки на Советот на Европа за борба против корупцијата. Седум препораки се делумно исполнети, десет воопшто не се исполнети, со што Србија е една од трите земји, заедно со Босна и Херцеговина и Шпанија, кои немаат исполнето ниту една од препораките.