ГРМЕЖИ, ПОРОЕН ДОЖД И СИЛЕН ВЕТЕР: Нестабилна облачна маса пристигна и во Скопје
Објавено во: Македонија 22 Мај, 2024
Пред половина час, ЦУК предупреди дека кон скопската котлина доаѓа нестабилна облачна маса проследена со интензивен пороен дожд и грмежи со правец на движење од југозапад кон североисток се приближува и очекува да ја зафати Скопската Котлина. „Во делови од котлината ќе има интензивен пороен дожд, чести грмежи, засилен ветер и можна појава на истовремено дожд и град (,,суградица")“ најавија оттаму.
Во моментов во делови од Скопје грми, дува и има пороен дожд.
Инаку денес претходно, метеорологот Попоски најави невреме.
„Денес особено попладне и навечер, особено во источната половина од државава ќе има локален развој на нестабилна облачност, проследена со пороен дожд, грмежи и засилен ветер. Локално повторно и тоа токму во споменатите предели можно е по силно невреме, проследено со обилен пороен дожд за кратко време, силен ветер, силни и чести електрични празнења и со појава на град кој би можел да биде по крупен.
Услови за пороен дожд, грмежи и засилен ветер ќе има и во делови од Скопската котлина.
Во случај на појава на невреме, како и на силни електрични празнења препорачуваме голема внимателност, односно да не се претстојува на отворен простор и под осамени дрвја.
Што се однесува до температурите, тие ќе се искачуваат во интервалот од 22 до 29-30 степени. Во Скопје температурата денес ќе достигне до околу 26-27 степени.
Потоа, утре и во петок ќе имаме по стабилна Атмосфера и без опасност од по големо невреме, а нови врнежи од дожд и нестабилност очекуваме за време на викендот.“ најави тој.